عالمی مالیاتی ادارے تسلیم کر رہے ہیں پاکستانی اکانومی ٹیک آف کر رہی ہے: وفاقی وزیرِ اطلاعات

وفاقی وزیرِ اطلاعات عطاء اللّٰہ تارڑ کا کہنا ہے کہ عالمی مالیاتی ادارے تسلیم کررہے ہیں پاکستان کی اکانومی ٹیک آف کررہی ہے، سفارتی محاذ پر پاکستان کو کامیابیاں مل رہی ہیں۔

میڈیا سے گفتگو کرتے ہوئے انہوں نے کہا کہ یو اے ای نے 10 ارب ڈالرز مختص کرنے کا اعلان کیا ہے، وزیرِ اعظم شہباز شریف اگلے چند دنوں میں چین کا دورہ کر رہے ہیں، عالمی جریدے پاکستان کی معیشت کی بحالی کی نوید سنا رہے ہیں، بانیٔ پی ٹی آئی نے کہا کہ میں نہ رہا تو پاکستان ٹوٹ جائے گا، سیاسی مفادات اور اپنی بقاء کو پاکستان کی بقاء سے جوڑا جاتا ہے، بانی و چیئرمین پی ٹی آئی نے اپنی خواہش پر وزرائے خزانہ سے آئی ایم ایف کو خط لکھوایا، آپ کی خواہش پر پاکستان تباہ نہیں ہو گا، بار بار نظام کو ڈی ریل کرنے کی کوششیں کی گئیں۔

ان کا کہنا ہے کہ وزیرِ اعظم شہباز شریف نے ناروے اور آئر لینڈ کے وزرائے اعظم سے گفتگو کی، ان دونوں ممالک نے مشرقِ وسطیٰ کی صورتِ حال پر جو فیصلہ لیا اس کی ستائش کی گئی، دونوں ممالک نے بہت جرأت مندانہ فیصلے کیے، وزیرِاعظم نے دونوں ہم منصبوں کو بتایا کہ پاکستان فلسطینیوں کے ساتھ ہے، وزیرِاعظم شہباز شریف نے دنیا کے امن کو غزہ میں امن سے مشروط قرار دیا۔

خطوط لکھنے کی روایت اب ختم ہونی چاہئے، عطاء تارڑ

کراچی جیو کے پروگرام ”آج شاہزیب خانزادہ کے ساتھ“...

وفاقی وزیرِ اطلاعات عطاء اللّٰہ تارڑ نے کہا ہے کہ وزیرِ اعظم پاکستان شہباز شریف نے مسئلہ فلسطین پر عالمی فورمز پر بات کی، مظلوم فلسطینیوں تک پیغام پہنچے گا کہ دنیا کے ممالک ان کی صورتِ حال پر تشویش میں ہیں، ہم فلسطین میں امن اور جنگ بندی کے خواہاں ہیں، پوری قوم فلسطینیوں اور غزہ کے عوام کے ساتھ اظہارِ یک جہتی کرے۔

انہوں نے کہا ہے کہ پاکستان ہمیشہ فلسطینیوں کے حق کے لے آواز اٹھاتا رہا ہے، غزہ میں امن کے بغیر دنیا میں امن قائم نہیں ہو سکتا، ہم فلسطین میں امن کے خواہاں ہیں، ہم فلسطین میں جنگ بندی چاہتے ہیں، دوسرے ممالک کے ساتھ روابط بہت اہمیت کے حامل ہیں، غزہ کے عوام کے ساتھ یک جہتی کا اظہار کرتے ہیں، وزیرِ اعظم ہر عالمی فورم پر فلسطین کے لیے آواز اٹھاتے ہیں۔

وفاقی وزیرِ اطلاعات عطاء اللّٰہ تارڑ نے خوشخبری سناتے ہوئے کہا کہ سعودی عرب کے ساتھ بھی 5 ارب ڈالرز کی سرمایہ کاری میں پیش رفت ہوئی ہے، جلد معاہدوں پر دستخط ہوں گے اور یہ معاہدے حتمی شکل اختیار کریں گے، کرنٹ اکاؤنٹ خسارہ کم ہوا ہے، ہماری آئی ٹی برآمدات میں اضافہ ہوا ہے، مہنگائی میں کمی واقع ہوئی ہے، زرِ مبادلہ کے ذخائر میں بھی اضافہ ہوا ہے جو مثبت پیش رفت ہے۔

انہوں نے سوال کیا ہے کہ کیا قومی سلامتی اور خارجہ پالیسی کھیلنے کے لیے ہوتی ہے؟ آپ نے اپنے دور میں دوست ممالک سے کیا رویہ اپنایا؟ کیا شیخ مجیب پر 190 ملین پاؤنڈ کا کیس تھا؟ کیا انہوں نے بھی تحائف بیچے؟ مظلوم وہ ہے جس نے بلیک مارکیٹ میں تحائف نہ بیچے ہوں، مظلوم وہ ہوتا ہے جس نے پراپرٹی ٹائیکون کے ساتھ مل کر 190 ملین پاؤنڈ کا ڈاکا نہ مارا ہو۔

وفاقی وزیرِ اطلاعات عطاء اللّٰہ تارڑ کا کہنا ہے کہ پاکستان کو ڈیفالٹ سے نکالنے میں حکومت نے بہت محنت کی، مخصوص ایجنڈے کے تحت کچھ لوگ منفی پروپیگنڈا کر رہے ہیں، پاکستان نے ترقی کرنی ہے، آگے بڑھنا ہے اور اپنا مقام بنانا ہے، یہ لوگ اپنے چھوٹے چھوٹے مفادات کے خلاف پاکستان کے مفادات کو داؤ پر لگا دیتے ہیں۔

ان کا کہنا ہے کہ مخصوص ایجنڈے کے تحت ملک کو ڈیفالٹ کی حد تک پہنچایا گیا، مخصوص سیاسی جماعت کے لوگوں نے آئی ایم ایف کو خطوط لکھے، پاکستان کی خارجہ پالیسی کے ساتھ کھیلا گیا، دوست ممالک سے ملنے والے تحائف کو بیچا گیا، مخصوص پروپیگنڈے کے تحت ملک کو 71 والے حالات سے ملانے کی کوشش کی گئی، اقتدار کا نشہ ٹوٹنے پر ملک کی جڑوں کو کمزور کرنے کی سازش کی جا رہی ہے۔

وفاقی وزیرِ اطلاعات عطاء اللّٰہ تارڑ نے کہا ہے کہ ان لوگوں نے دوست ممالک کے ساتھ پاکستان کے تعلقات خراب کیے، یہ گھڑیاں اور انگوٹھیاں اکٹھی کرنے میں مصروف تھے، یہ اتنے مصروف تھے کہ انہیں ملکی معیشت اور ملکی تعلقات کی کوئی پرواہ نہیں تھی، آج یہ اپنے آپ کو مظلوم ثابت کرنے کی کوشش کر رہے ہیں، ملک ڈیفالٹ سے بچ گیا تو ان کے ارمان ٹوٹ گئے، ان کی کوشش تھی کہ ملک ڈیفالٹ کر جائے اور یہ سیاسی فائدہ اٹھا سکیں، 9 مئی کو سازش کر کے انہوں نے سیاسی فائدہ اٹھانے کی کوشش کی، ان کی ہمیشہ یہی کوشش رہی ہے کہ ملکی سالمیت کو داؤ پر لگا کر سیاسی فائدہ لیا جائے۔