فرمان الہی
نماز کے اوقات
اسلام آباد، شینزن، بیجنگ (نیوز ایجنسیاں، مانیٹرنگ ڈیسک) وزیراعظم شہباز شریف کے دورہ چین میں بزنس ٹو بزنس میٹنگز کے بعد مختلف شعبوں میں 32 مفاہمت کی یادداشتوں (ایم او یوز) پر دستخط کیے گئے ہیں، توانائی، آٹو موبائل، آئی ٹی، ادویہ سازی اور دیگر شعبوں میں تعاون ہوگا، چینی کمپنیوں نے پاکستان میں الیکٹرک بائیکس، جدید زراعت میں سرمایہ کاری کیلئے دلچسپی کا اظہار کیا ہے، چین 2؍ لاکھ پاکستانیوں کو بھی AIکی تربیت دیگا، وزیراعظم شہباز شریف کا کہنا ہے کہ میں قرض نہیں کاروبار اور ترقی کیلئے آیا ہوں، پاکستانی کمپنیاں چینی ماڈل اپنائیں، وزیراعظم نے ہواوے ہیڈ کوارٹر اور چینی میوزیم کا دورہ کیا، اس موقع پر انہوں نے ہواوے کو پاکستان میں سرمایہ کاری کو وسعت دینے اور سیف سٹی منصوبے قائم کرنے کی دعوت دی، جبکہ وزیر خزانہ محمد اورنگزیب نے کہا ہے کہ وزیراعظم کے ایجنڈے کے تحت معیشت کی ترقی میں حکومت نہیں بلکہ نجی شعبہ اپنا کلیدی کردار ادا کریگا، آئندہ مالی سال کے دوران پانڈا بانڈ جاری کرینگے، چینی تاجروں اور سرمایہ کاروں کو پاکستان میں اپنی سرمایہ کاری میں اضافہ کرنا چاہیے،کرنٹ اکاؤنٹ خسارہ کم، ترسیلات زر اور برآمدات میں اضافہ ہو رہا ہے، ٹیکس شرح بڑھا کر 14فیصد کرینگے، نائب وزیراعظم اسحق ڈار نے کہا پاکستان میں آئی ٹی، معدنی وسائل سمیت کئی شعبوں میں سرمایہ کاری کے وسیع مواقع موجود ہیں۔تفصیلات کے مطابق شینزن میں وزیراعظم نے ہواوے اور وزارت سائنس و ٹیکنالوجی کے مابین فریم ورک معاہدے پر دستخط کی تقریب میں بھی شرکت کی۔ فریم ورک ایگریمنٹ کے تحت ہواوے پاکستان کے 2 لاکھ نوجوانوں کو انفارمیشن ٹیکنالوجی کے شعبے بشمول مصنوعی ذہانت کے شعبے میں مفت تربیت فراہم کریگا۔اسکے علاوہ ہواوے پاکستان میں سیف سٹیز کے قیام، ای گورننس اور معیشت کی ڈیجیٹائزیشن میں بھی بھرپور تعاون فراہم کریگا، ہواوے کے چیئرمین نے وزیراعظم اور پاکستانی وفد کے اعزاز میں ظہرانہ بھی دیا۔ وزیراعظم شہبازشریف کے ہواوے ہیڈ کوارٹرز پہنچنے پر ہواوے کمپنی کے چیئرمین لیانگ ہوا نے پر تپاک استقبال کیا، پاکستانی ملی نغمے بجائے گئے، وزیراعظم کو دورے کے دوران کمپنی کے حکام کی طرف سے بریفنگ دی گئی۔ چیئرمین ہواوے نے پاکستان کے مختلف شعبوں میں سرمایہ کاری میں گہری دلچسپی کا اظہار کیا جبکہ وزیراعظم نے ہواوے کو پاکستان میں سرمایہ کاری کو وسعت دینے اور پاکستان کے مختلف شہروں میں ترجیحی بنیاد پر سیف سٹی منصوبے قائم کرنے کی دعوت دی۔ وزیراعظم نے ہواوے ہیڈ کوارٹرز میں ایگزیبیشن سینٹر کا دورہ کیا، چیئرمین ہواوے نے وزیراعظم کو ہواوے کے دنیا بھر بالخصوص پاکستان میں آپریشنز بارے میں آگاہ کیا اور پاکستان کے مختلف شعبوں میں سرمایہ کاری میں گہری دلچسپی کا اظہار کیا۔ وزیراعظم نے ہواوے کے آپریشنز کی جدت کی تعریف کی اور ہواوے کو پاکستان میں اپنی سرمایہ کاری کو وسعت دینے کی ترغیب دی۔ایگزیبیشن سینٹر میں وزیراعظم کو مختلف شعبوں بالخصوص ای گورننس، ڈیجیٹل بینکنگ، ٹیلی کمیونی کیشن، مصنوعی ذہانت کے حوالے سے بریفنگ دی۔ وزیراعظم نے ہواوے کے تعاون سے پاکستان میں بننے والے سیف سٹی منصوبوں کی تعریف کی۔ وزیراعظم اور پاکستانی وفد کی چیئرمین ہواوے کے ساتھ دوطرفہ ملاقات ہوئی، ملاقات میں وزیراعظم نے چیئرمین ہواوے کو حکومت کے پاکستان میں سرمایہ کاری کے فروغ اور کاروبار کی سہولت کیلئے اٹھائے گئے اقدامات سے آگاہ کیا۔ وزیراعظم نے ہواوے کو پاکستان کے مختلف شہروں بالخصوص ایسے شہر جن میں سی پیک منصوبوں پر کام جاری ہے ان میں ترجیحی بنیادوں پر سیف سٹی منصوبے قائم کرنے کی دعوت دی۔ وزیراعظم نے کہا کہ حکومت سرکاری دفاتر کو ترجیحی بنیادوں پر ڈیجیٹائز کرنے کیلئے اقدمات اٹھا رہی ہے۔ انہوں نے کہا کہ ٹیکس کا نظام، ای گورننس، مصنوعی ذہانت کے شعبوں میں ہواوے جیسی بڑی کمپنی کیلئے پاکستان میں سرمایہ کاری کے وسیع مواقع موجود ہیں۔ وزیراعظم شہباز شریف نے ہواوے کے چیئرمین کو پاکستان میں زرعی شعبے میں جدید ٹیکنالوجی میں سرمایہ کاری کی بھی دعوت دی۔ وزیراعظم نے چیئرمین ہواوے کو جلد پاکستان کے دورے کی بھی دعوت دی۔
