کوئی شک نہیں بنگلادیش نے اچھا کھیلا ہے، جیسن گلیسپی

02 ستمبر ، 2024

پاکستان ٹیسٹ ٹیم کے ہیڈ کوچ جیسن گلیسپی نے کہا ہے کہ کوئی شک نہیں بنگلادیش نے اچھا کھیلا ہے۔

راولپنڈی ٹیسٹ کے چوتھے دن کے کھیل سے متعلق گفتگو میں جیسن گلیسپی نے کہا کہ کنڈیشنز اور پچ دیکھتے ہوئے دوسرے ٹیسٹ کےلیے بولنگ کمبینیشن بنایا۔

انہوں نے کہا کہ پہلے ٹیسٹ کو دیکھتے ہوئے دوسرے ٹیسٹ کےلیے کھلاڑیوں کو منتخب کیا، کوئی شک نہیں بنگلادیش نے اچھا کھیلا ہے۔

قومی ٹیم کے ہیڈ کوچ نے مزید کہا کہ شاہین آفریدی چند چیزوں پر کام کریں، ہمیں فاسٹ بولر مکمل فٹ اور پرفارمنس دیتے ہوئے چاہیے۔ شاہین آفریدی تینوں فارمٹس کے کھلاڑی ہیں، ہمیں ایسی ٹیم بنانی ہے جو کنڈیشنز کو دیکھتے ہوئے اپنی بہترین پرفارمنس دے۔

جیسن گلیسپی نے یہ بھی کہا کہ صرف چند کھلاڑیوں پر ہی ٹیم کو انحصار نہیں کرا سکتے، میں کنڈیشنز سے خوش ہوں، ان سے کوئی مسئلہ نہیں۔

انہوں نے کہا کہ ہمیں معلوم ہے ہم نے اچھی بولنگ نہیں کی، ہم بہتر بولنگ کرسکتے تھے، اس پر کوئی سوال ہی نہیں کہ بنگلادیش نے اچھی کرکٹ کھیلی ہے۔

کھیلوں کی خبریں سے مزید