فرمان الہی
نماز کے اوقات
پاکستان کے نامور تھیٹر اداکار اور کامیڈین نسیم وکی کا کہنا ہے کہ مجھے لگتا ہے کہ کامیڈی نائٹس ود کپل میں کام کرنا میری سب سے بڑی غلطی تھی۔
انہوں نے یہ بات حال ہی میں ساتھی مزاحیہ اداکار و میزبان احمد علی بٹ کی پوڈ کاسٹ میں بطور مہمان شرکت کرتے ہوئے ساتھی فنکاروں کے رویے سے مایوس ہو کر کہی۔
نسیم وکی کے مطابق انہیں سرحد پار کام کرنے سے محبت و تعریف سے زیادہ تنقید اور مخالفت کا سامنا کرنا پڑا۔
انہوں نے واسع چوہدری اور محسن عباس حیدر کا نام لیتے ہوئے کہا کہ میں واسع کا بہت احترام کرتا ہوں، لیکن انہوں نے اور محسن عباس حیدر نے میرے بارے میں کچھ تبصرے و بیانات اس طرح دیے کہ سرحد پار جا کر کام کرنا کوئی بہت بڑی کامیابی نہیں ہے جبکہ محسن عباس کو ذاتی طور پر جانتا بھی نہیں ہوں۔
انہوں نے مایوسی کا اظہار کرتے ہوئے کہا کہ مجھے شرمندگی ہے، میری زندگی کی سب سے بڑی غلطی ہے کہ میں نے کامیڈی نائٹس ود کپل میں کام کیا، جس کی وجہ سے مجھے کبھی کوئی فائدہ نہیں ہوا، نہ کوئی پزیرائی ملی بلکہ بین الاقوامی سطح پر پاکستان کی نمائندگی کرنے پر الٹا مجھ پر اور میرے کام پر تنقید کی گئی کہ میں نے وہاں جا کر کیا ہی کیا ہے؟
کامیڈین نے یہ بھی کہا کہ پاکستانی انڈسٹری میں کامیڈین بغیر اسکرپٹ کے کام کرتے ہیں، اس لیے کامیاب نہیں ہوتے خاص طور سے تھیٹر میں اب کوئی بھی نوجوان اداکار ریہرسل نہیں کرتا، یہی وجہ ہے کہ گزشتہ 10 برس میں کوئی نیا ٹیلنٹ کامیڈی کے میدان میں نہیں ابھرا۔
