فرمان الہی
نماز کے اوقات
باکو،تاشقند ،اسلام آباد(نمائندہ جنگ) وزیراعظم محمد شہباز شریف نے کہا ہے کہ اسلام آباد میں خدمت مرکز جیسا پراجیکٹ شروع کرنے کیلئے آذر بائیجان کے تجربات سے استفادہ کرینگے، ’’آسان خدمت‘‘ ایک منفرد ون اسٹاپ شاپ ماڈل ہے جس سے شہریوں کو 400سے زائد خدمات تک رسائی حاصل ہوتی ہے جو 30سرکاری اور 15نجی اداروں کی طرف سے ایک ہی چھت تلے میسر ہیں، وزیراعظم شہبازشریف ازبک صدردعوت پر 2روزہ دورہ پر تاشقند پہنچ گئے، ازبک وزیراعظم، وزیر ِخارجہ، تاشقندکے میئر سمیت اعلیٰ سفارتی وسرکاری اہلکاروں نے استقبال کیا،علاوہ ازیں شہباز شریف نے کویت کے یوم آزادی کےموقع پر امیرکویت، ولی عہداورعوام کو مبارکباد دی۔ تفصیلات کے مطابق وزیراعظم شہباز شریف نے گزشتہ روز آذربائیجان کے دارالحکومت باکو میں عوامی خدمات کی فراہمی کے جدید مرکز ’’آسان خدمت‘‘ کا دورہ کیا اور عوامی فلاح و بہبود کی اس سہولت کے جدید ماڈل کو سراہا۔ آسان خدمت مرکز آمد پر آذربائیجان کے صدر کی زیر نگرانی عوامی خدمت اور سماجی اختراع کی ریاستی ایجنسی (SAPSSI) کے چیئرمین الوی مہدییف نے وزیر اعظم کا استقبال کیا۔اس موقع پر وزیر اعظم پر کو بتایا گیا کہ آسان خدمت شہریوں کی آسانی کو مقدم رکھ کر مؤثر عوامی خدمات کی فراہمی میں اپنی بہتر کارکردگی کے باعث ایک معروف ادارہ بن چکا ہے، یہ عوامی خدمات کی فراہمی میں سہولت فراہم کرنے کیلئے ایک منفرد ون سٹاپ شاپ ماڈل ہے۔ وزیر اعظم شہباز شریف نے "آسان خدمت" کی شکل میں عوامی خدمات کی فراہمی کے اس کے جدید ماڈل کی تعریف کی جس نے دیگر ممالک کے لئے خدمات کا ایک اعلی معیار قائم کیا ہے۔ وزیر اعظم نے کہا کہ ہم اسلام آباد میں "خدمت مرکز" کی طرز کا ایک پائلٹ پراجیکٹ شروع کرنا چاہتے ہیں اور اس سلسلے میں ہم آذربائیجان کے سا تھ معاہدہ کر کے آپکے تجربات سے استفادہ کرینگے۔ انہوں نے آسان خدمت کی ایک ٹیم کو پاکستان کا دورہ کرنے اور باہمی تعاون کے مواقع تلاش کرنے کی دعوت دی۔ الوی مہدییف نے وزیر اعظم کو بتایا کہ یہ سروس صدر الہام علیوف کا تاریخی اقدام ہے جسکا آغاز جامع ادارہ جاتی گورننس اصلاحات کے حصے کے طور پر کیا گیا ہے اور جسکا مقصد شہریوں کو زیادہ سے زیادہ سہولت فراہم کرنا ہے۔ یہ ماڈل عوامی خدمات کی شفاف، جوابدہ اور موثر فراہمی یقینی بناتا ہے ۔ وزیر اعظم نے صدر الہام علیوف کی بصیرت انگیز قیادت کی تعریف کی اور عوامی فلاح و بہبود کی اس سہولت کو سراہا۔ وزیر اعظم نے خدمت مرکز میں قائم سٹارٹ اپس کے فروغ کیلئے قائم سنٹر (INNOLAND) کا بھی دورہ کیا۔نائب وزیر اعظم و وزیر خارجہ محمد اسحاق ڈار، وزیر تجارت جام کمال خان، وزیر سرمایہ کاری و نجکاری عبدالعلیم خان، وزیر اطلاعات و نشریات عطاء اللہ تارڑ اور وزیر اعظم کے معاون خصوصی سید طارق فاطمی بھی وزیر اعظم کے ہمراہ تھے۔ دوسری جانب وزیراعظم محمد شہباز شریف نے کویت کے قومی دن اور یوم آزادی کے موقع پر امیر کویت شیخ مشعل الاحمد الجابر الصباح ولی عہد شیخ صباح الخالد الحماد الصباح، وزیر اعظم شیخ عبداللہ الاحمد الصباح اور عوام کو مبارکباد دی ہے۔ وزیراعظم نے اپنے تہنیتی پیغام میں کہا کہ وہ امیر کویت شیخ مشعل الاحمد الجابر الصباح اور وزیر اعظم شیخ عبداللہ الاحمد الصباح کو اور کویت کی حکومت کو برادر ریاست کے قومی دن اور یوم آزادی کے موقع پر دلی مبارکباد پیش کرتے ہیں۔ انہوں نے کہا کہ اس پرمسرت موقع پر ہم غیر ملکی جارحیت سے آزادی کا جشن منانے میں کویتی عوام کے ساتھ ہیں۔انہوں نے کہا کہ پاکستان اور کویت کے دوطرفہ تعلقات ہماری مشترکہ تاریخ، مذہب اور ثقافت پر مبنی ہیں،ہم ہر مشکل وقت میں ایک دوسرے کے ساتھ کھڑے ہیں، ہم اپنے تعلقات کو نئی بلندیوں تک پہنچانے، باہمی طور پر مفید تعاون کو بڑھانے اور علاقائی امن اور خوشحالی کے لئے کویت کی قیادت کے ساتھ مل کر کام کرنے کو تیار ہیں۔بعد ازاں وزیراعظم محمد شہباز شریف ازبکستان کے صدر شوکت مرزیایوف کی خصوصی دعوت پر 2 روزہ دورہ پر تاشقند پہنچ گئے۔ازبکستان کے وزیراعظم عبداللہ عاریپوف، ازبک وزیرِ خارجہ بختیار سیدوف، تاشقند کے میئر شوکت عمرزاکوف، ازبکستان کے پاکستان میں سفیر علی شیر تختائیف اور پاکستان کے ازبکستان میں سفیر احمد فاروق سمیت اعلیٰ سفارتی و سرکاری اہلکاروں نے وزیرِ اعظم کا استقبال کیا۔
