فرمان الہی
نماز کے اوقات
بلوچستان کے ضلع قلات کے علاقے منگچر میں مسلح افراد کی فائرنگ سے ٹیوب ویل کی تنصیب کرنے والے چار مزدور جاں بحق ہوگئے۔ جاں بحق افراد کا تعلق پنجاب کے علاقے صادق آباد سے ہے۔
اسسٹنٹ کمشنر منگچر علی گل کے مطابق کے مطابق نامعلوم مُسلح افراد نے قلات کے علاقے منگچر کی ملنگ زئی میں ٹیوب ویل کی تنصیب پر کام کرنے والے مزدوروں پر فائرنگ کردی جس کے نتیجے میں 4 افراد جاں بحق ہوئے۔
جاں بحق افراد میں منور حسین، ذیشان، دلاور حسین، اور محمد امین موقع پر جان بحق ہوگئے۔ لاشوں کو ضروری کارروائی کے بعد صادق آباد روانہ کردیا گیا ہے۔
صدر مملکت آصف علی زرداری نے منگچر میں مزدوروں پر فائرنگ کے واقعے کی مذمت کی ہے اور واقعے میں قیمتی جانی نقصان پر گہرے دُکھ اور افسوس کا اظہار کیا ہے۔
ایوان صدر سے جاری بیان میں صدر مملکت نے دہشت گردوں کے خلاف موثر کارروائی پر زور دیا اور کہا کہ بےگناہ مزدوروں اور عام شہریوں کو نشانہ بنانا سفاکانہ اور قابل مذمت فعل ہے۔
صدر مملکت نے واقعے میں جاں بحق افراد کے لواحقین کے ساتھ اظہار تعزیت بھی کیا۔
وزیراعظم شہباز شریف نے بھی قلات کے علاقے منگچر میں دہشت گردوں کی مزدوروں پر فائرنگ کی مذمت کی۔ انہوں نے واقعے میں جاں بحق 4 مزدوروں کی بلندی درجات کی دعا کی جبکہ لواحقین سے اظہار تعزیت کیا۔
وزیراعظم کا کہنا تھا کہ غم کی اس گھڑی میں ہم غریب محنت کش مزدوروں کے خاندانوں کے ساتھ کھڑے ہیں، غریب مزدوروں اور محنت کش افراد کو نشانہ بنانے والے انسانیت کے دشمن ہیں۔
وزیراعظم نے کہا کہ ملک سے ہر قسم کی دہشت گردی کے خاتمے تک چین سے نہیں بیٹھیں گے۔
