فرمان الہی
نماز کے اوقات
پاکستانی اداکارہ مدیحہ امام نے انکشاف کیا ہے کہ سینئر اداکار فیصل قریشی کے مدِ مقابل ایک ڈرامے کی شوٹنگ کے دوران تھپڑ لگنے کے سبب ان کے ایک کان کی قوتِ سماعت کمزور ہو گئی ہے۔
عید الفطر کے موقع پر نجی ٹی وی چینل کی خصوصی ٹرانسمیشن میں متعدد فنکاروں نے شرکت کی۔
اس دوران ساتھی اداکاروں کے ساتھ ایک کھیل کھیلتے ہوئے اداکارہ مدیحہ امام نے انکشاف کیا کہ مجھے ایک کان سے کم سنائی دیتا ہے، اداکارہ کے اس بیان کی اداکار فیصل قریشی نے بھی تصدیق کی۔
مدیحہ امام نے تفصیل بتاتے ہوئے کہا کہ میں اپنے ایک کان سے کم سُنتی ہوں، میں مکمل طور پر سماعت سے محروم نہیں ہوں لیکن مجھ سے بات کرتے ہوئے آپ کو تھوڑا سا اونچا بولنا پڑے گا، یہ ایک سیٹ پر ایک صورتِ حال کے سبب ہوا تھا۔
فیصل قریشی نے مدیحہ امام کی بات کو آگے بڑھاتے ہوئے کہا کہ میں جانتا ہوں کہ یہ سچ ہے، مدیحہ سچ بول رہی ہیں، مدیحہ کے ساتھ یہ حادثہ ایک سیٹ پر پیش آیا تھا۔
مدیحہ امام نے مزید کہا کہ ساتھی اداکار کی جانب سے تھپڑ رسید کیا گیا جس کا اثر میرے کان پر ہوا تھا اور اب مجھے ایک کان سے کم سنائی دیتا ہے۔
انہوں نے یہ بھی کہا کہ جن لوگوں کو لگتا ہے کہ اداکار بہت آرام اور سکون سے کام کر لیتے ہیں تو اداکاری بالکل آسان کام نہیں ہے۔
اس موقع پر اداکارہ نے وضاحت نہیں کی کہ کس ساتھی اداکار کا تھپڑ لگنے سے ان کی سماعت متاثر ہوئی ہے۔
