فرمان الہی
نماز کے اوقات
پاکستان سپر لیگ (پی ایس ایل) 10 کے پہلے میچ میں دفاعی چیمپئن اسلام آباد یونائیٹڈ نے لاہور قلندرز کو باآسانی 8 وکٹ سے شکست دے دی۔
راولپنڈی کرکٹ اسٹیڈیم پر کھیلے گئے میچ میں لاہور قلندرز نے اسلام آباد یونائیٹڈ کو 140 رنز کا ہدف دیا، جو اُس نے 18ویں اوور میں 2 وکٹ کے نقصان پر حاصل کرلیا۔
اسلام آباد یونائیٹڈ کے کولن منرو نے 42 گیندوں پر 59 رنز بنائے، اُن کی اننگز 7 چوکے اور 1 چھکا شامل تھا جبکہ سلمان علی آغا نے 34 گیندوں پر 41 رنز بنائے۔
دونوں ہی کھلاڑی 80 رنز کی شراکت قائم اور ناقابل شکست رہے، اسلام آباد کے صاحبزادہ فرحان 25 اور اینڈرریز گوس 4 رنز بناکر آؤٹ ہوئے۔
لاہور قلندرز کی طرف سے آصف آفریدی اور حارث روف نے 1،1 وکٹ حاصل کی جبکہ شاہین آفریدی، جہانداد خان، ڈیوڈ ویزے اور سکندر رضا کوئی بھی وکٹ لینے میں ناکام رہے۔
اس سے قبل میچ میں اسلام آباد یونائیٹڈ نے ٹاس جیت کر پہلے فیلڈنگ کا فیصلہ کیا تھا، لاہور قلندرز کی ٹیم آخری اوور میں 139 رنز بناکر ڈھیر ہوگئی۔
عبداللّٰہ شفیق نے 66 رنز کی باری کھیلی، انہوں نے 38 گیندوں پر 66 رنز بنائے، ان کی اننگز میں 3 چھکے اور 6 چوکے شامل تھے۔
دیگر کھلاڑیوں میں سکندر رضا 23، ڈیرن مچل 13 اور حارث رؤف 10 بناکر نمایاں بیٹر رہے۔
فخر زمان 1، محمد نعیم 8، سیم بیلنگز، جہانداد خان اور ڈیوڈ ویزے صفر پر پویلین لوٹے جبکہ شاہین آفریدی اور آصف آفریدی نے 2،2 رنز بنائے۔
اسلام آباد یونائیٹڈ کے جیسن ہولڈر نے 4، شاداب خان نے 3 وکٹ اپنے نام کیے جبکہ نسیم شاہ، عماد وسیم اور ریئیلی نے 1،1 وکٹ حاصل کی۔
اسلام آباد یونائیٹڈ 3 بار پی ایس ایل جیت چکی ہے جبکہ لاہور قلندرز نے 2 بار ٹرافی اپنے نام کی ہے۔
راولپنڈی کرکٹ اسٹیڈیم پر کھیلے جارہے میچ میں اسلام آباد یونائیٹڈ کی قیادت شاداب خان جبکہ لاہور قلندرز کی کپتانی کے فرائض شاہین آفریدی کے پاس ہے۔
لاہور قلندرز کی طرف سے محمد نعیم، ڈیرل مچل اور آصف آفریدی ڈیبیو کر رہے ہیں۔
اسلام آباد یونائیٹڈ کے دیگر کھلاڑیو ں میں صاحبزادہ فرحان، اعظم خان، سلمان علی آغا، کولن منرو، شاداب خان، جیسن ہولڈر، محمد شہزاد، عماد وسیم، نسیم شاہ، رئیلی میرڈیتھ اور اینڈیز گوس شامل ہیں۔
لاہور قلندرز کی فائنل الیون میں فخر زمان، عبداللّٰہ شفیق، محمد نعیم، ڈیرل مچل، سکندر رضا، ڈیوڈ ویزے، شاہین آفریدی، جہانداد خان، حارث رؤف، آصف آفریدی اور سیم بیلنگ شامل ہیں۔
