فرمان الہی
نماز کے اوقات
وزیر دفاع خواجہ محمد آصف نے کہا ہے کہ مطالبہ غیر مشروط طور پر مان لیا گیا ہے، ہم نہیں چاہتے کہ پانی کے مسئلے پر قومی اختلاف پیدا ہو۔
جیو نیوز کے پروگرام آج شاہزیب خانزادہ کے ساتھ میں گفتگو کے دوران خواجہ آصف نے کہا کہ جس کےلیے احتجاج ہورہا تھا وہ مطالبہ غیرمشروط طور پر مان لیا گیا ہے۔
انہوں نے کہا کہ نہروں کا معاملہ جب بھی ہوگا صوبوں کے اتفاق رائے سے حل ہوگا، ہم نہیں چاہتے کہ پانی کے مسئلے پر قومی اختلاف پیدا ہوا۔
وزیر دفاع نے مزید کہا کہ بھارتیہ جنتا پارٹی جب سے آئی ہے الیکشن کے وقت ایسے ڈرامے رچائے جاتے ہیں۔ نریندر مودی کا طریقہ واردات ہے کہ نفرت کو ہوا دو اور پھر ووٹ حاصل کرو، بھارت کے لیے نریندر مودی نقصان دے ثابت ہوں گے۔
خواجہ آصف نے یہ بھی کہا کہ گجرات میں مسلمانوں کا قتل عام ہوا تھا، نریندر مودی اب تک اس ذہنیت سے نہیں نکلے، بھارت خود کو سب سے بڑی جمہوریت کہتا ہے اور تنقید برداشت نہیں کرسکتا۔
وزیر دفاع نے کہا کہ خطے کے جتنے ممالک ہیں، بھارت نے سب کے ساتھ ہاتھ کیا ہے، بھارت جو کر رہا ہے کہ یہ بھی دہشت گردی کی ایک واردات ہے، پہلے واردات کی اور پھر الزام سرحد پار پاکستان پر لگا دیا۔
انہوں نے کہا کہ اس خطے پر جنگ مسلط کی جارہی ہے، ہم بھرپور جواب دیں گے، ہماری بھرپور تیاری ہے، ملک کے ایک ایک انچ کا دفاع کریں گے۔
خواجہ آصف نے کہا کہ بڑا گھٹیا دشمن ہے، اس سے ہر حرکت کی توقع رکھنی چاہیے، بھارت پر عالمی دباؤ بڑھ رہا ہے، امریکا اور برطانیہ بھارتی بیانیہ کی حمایت نہیں کررہے۔
