فرمان الہی
نماز کے اوقات
پاک جاپان بزنس کونسل کے صدر رانا عابد حسین نے کہا ہے کہ عبد الحمید بھٹہ ایک تجربہ کار اور اہل سفارتکار ہیں اور جاپان جیسے ترقی یافتہ ملک میں ان کی تعیناتی پاکستان کے لیے ایک اہم موقع ہے۔
رانا عابد حسین نے جاپان میں تعینات ہونے والے نئے سفیر عبد الحمید بھٹہ کو خوش آمدید کہا ہے۔
ایک بیان میں انہوں نے امید ظاہر کی کہ نئے سفیر کی تقرری سے ناصرف پاکستانی کمیونٹی کے دیرینہ مسائل حل ہوں گے بلکہ پاک جاپان اقتصادی، تجارتی اور کاروباری تعلقات میں بھی مثبت پیش رفت دیکھنے کو ملے گی۔
انہوں نے مزید کہا کہ جاپان میں مقیم ہزاروں پاکستانی جن میں طلبہ، ورکرز، کاروباری حضرات اور خاندان شامل ہیں کو سفارت خانے سے کئی توقعات وابستہ ہیں، خاص طور پر ویزا، کاغذی کارروائی، NICOP، پاسپورٹ اور قونصلر سروسز کے سلسلے میں۔
رانا عابد حسین نے حکومتِ پاکستان سے اپیل کی کہ سفیر کو مکمل اختیارات دیے جائیں تاکہ وہ کمیونٹی کی شکایات سن کر فوری طور پر ان کا حل نکال سکیں۔
انہوں نے اس امید کا اظہار بھی کیا ہے کہ عبد الحمید بھٹہ پاک جاپان تجارتی تعاون کو فروغ دینے کے لیے پاکستانی تاجروں اور جاپانی سرمایہ کاروں کے درمیان پل کا کردار ادا کریں گے۔
