فرمان الہی
نماز کے اوقات
سعودی عرب میں واقع گرین ماؤنٹین پارک میں پینڈولم جھولا حادثے کا شکار ہو گیا جس کے نتیجے میں 23 افراد زخمی ہو گئے۔
غیر ملکی میڈیا رپورٹس کے مطابق یہ حادثہ سعودی عرب کے سیاحتی شہر طائف میں پیش آیا جہاں مشہور جھولا دورانِ سواری اچانک ٹوٹ گیا اور اس میں سوار متعدد افراد ہوا میں اڑتے ہوئے زمین پر جا گرے جن میں سے بعض کی حالت تشویشناک بتائی جا رہی ہے۔
یہ حادثہ رواں ہفتے کی بدھ کی شام کو پیش آیا۔
میڈیا رپورٹس کے مطابق ’360 بگ پینڈولم‘ جھولے کو گرین ماؤنٹین پارک کا مرکزی جھولا قرار دیا جاتا ہے۔
سوشل میڈیا پر وائرل ویڈیوز میں دیکھا جا سکتا ہے کہ پینڈولم جھولا معمول کے مطابق سیاحوں کو جھولے دے رہا ہے۔
پینڈولم جھولے کے سوار اس دوران خوشی سے چیخ و پکار کر رہے ہیں کہ اچانک ایک تیز آواز آتی ہے اور جھولے کا مرکزی ستون دو حصوں میں ٹوٹ جاتا ہے، اس کے بعد جھولے میں بیٹھے افراد جن میں زیادہ تر خواتین ہیں، جھولے سمیت پلیٹ فارم پر جا گرتے ہیں اور ہر طرف چیخ و پکار کی آوازیں آنے لگتی ہیں۔
عینی شاہدین کے مطابق جھولے کے سواروں کو سیفٹی بیلٹس سے باندھا گیا تھا لیکن اس کے باوجود بہت سے افراد جھولے سے گر کر شدید زخمی ہوئے۔
میڈیا رپورٹس کے مطابق مقامی انتظامیہ نے فوری طور پر پارک کو بند کر کے علاقے کو سیل کر دیا اور افسوسناک واقعے کی وجہ معلوم کی جا رہی ہے۔
دوسری جانب عرب میڈیا کے مطابق علاقے کے گورنر شہزادہ سعود بن ناہر بن سعود بن عبدالعزیز نے واقعے کا نوٹس لیتے ہوئے گرین ماؤنٹین ریزورٹ کو مکمل طور پر بند کرنے کا حکم دے دیا۔
