• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پاکستان کی طرف سے ویتنام کو بدھا کے تاریخی مجسمہ کی نقل کا تحفہ

آج کا اخبار
اہم خبریں
03 اگست ، 2025
ہنوئی (صباح نیوز)پاکستان اور ویتنام کے درمیان ثقافتی اور روحانی یکجہتی کی علامت کے طور پر پاکستان نے معروف گندھارا دور کے روزہ دار بدھا کے ایک شاندار مجسمے کی نقل ویتنام کے سب سے بڑے بدھ مت مندر بائی ڈنھ پاگوڈا کو تحفے میں دے دی۔ پاکستانی دفتر خارجہ سے جاری تفصیلات کے مطابق یہ تاریخی مجسمہ جو دوسری صدی عیسوی کے گندھارا دور سے تعلق رکھتا ہے، سِکری (پاکستان) میں دریافت ہوا تھا اور اصل نمونہ اس وقت لاہور میوزیم میں محفوظ ہے۔ مجسمے میں شہزادہ سدھارتھ کو سخت ریاضت کرتے ہوئے دکھایا گیا ہے جو ان کی روحانی بیداری کی علامت ہے۔مجسمے کی نقل پاکستان کی جانب سے تحفے کے طور پر دی گئی ہے، جو بین المذاہب ہم آہنگی کی اقدار کی نمائندگی کرتی ہے۔تقریب کا آغاز ویتنام بدھسٹ سنگھا کے سیکرٹری جنرل مہا وینریبل تھِچ ڈک تھین کی قیادت میں دعائوں سے ہوا، جنہوں نے اس مجسمہ کی پاکستانی سفارتخانے سے روانگی سے قبل بابرکت قرار دیا۔نِنھ بنھ میں واقع بائی ڈنھ پاگوڈا پہنچنے پر مجسمے کو مہا وینریبل تھِچ مِنہ کوانگ نے روایتی بدھ مت رسومات کے ساتھ خوش آمدید کہا۔تقریب میں سینئر ویتنامی حکام، مذہبی رہنمائوں اور بین الاقوامی معزز مہمانوں نے شرکت کی۔پاکستان کے سفیر کوہدیار مری نے اس موقع پر کہا کہ یہ تحفہ پاکستان کی روحانی اور ثقافتی میراث کا عکس ہے، ہم تمام مذاہب کا احترام کرتے ہیں اور امن، رواداری ، بین الثقافتی مکالمے کو فروغ دینا چاہتے ہیں، اسلام کا حقیقی پیغام بھی احترام اور ہم آہنگی ہے۔تھِچ مِنہ کوانگ نے اس اقدام کو بین المذاہب خیرسگالی کی روشن مثال قرار دیا اور پاکستان کا شکریہ ادا کرتے ہوئے کہا کہ یہ تعاون دونوں ممالک کے عوام کے درمیان باہمی سمجھ بوجھ اور دوستی کو فروغ دے گا۔تقریب کا اختتام پاکستان اور ویتنام کے درمیان دیرپا دوستی، امن اور روحانی یکجہتی کیلئے خصوصی دعائوں کے ساتھ کیا گیا۔
اہم خبریں سے مزید