فرمان الہی
نماز کے اوقات
اسپیکر قومی اسمبلی سردار ایاز صادق نے سیلاب متاثرین کے لیے امداد اور انکی بحالی میں تعاون کی اپیل کر دی۔
اسلام آباد میں میڈیا سے گفتگو کرتے ہوئے اسپیکر قومی اسمبلی نے کہا کہ مخیر حضرات، فلاحی ادارے اور سول سوسائٹی سیلاب متاثرین کی مدد کےلیے آگے بڑھیں۔
اسپیکر ایاز صادق کا کہنا تھا کہ مخیر حضرات اور سول سوسائٹی حکومت کی امدادی کوششوں میں تعاون کریں۔ من حیث القوم سیلاب متاثرین کی بحالی ہماری اجتماعی ذمہ داری ہے۔
انہوں نے کہا کہ خیبر پختونخوا، گلگت بلتستان، آزاد کشمیر اور دیگر علاقوں کے متاثرین کو فوری ریلیف کی ضرورت ہے۔
اسپیکر قومی اسمبلی کا کہنا تھا کہ مخیر حضرات متاثرین کی بحالی اور گھروں کی تعمیر نو کے لیے دل کھول کر مدد کریں۔ نوجوان رضاکار بن کر متاثرین کی بحالی، خوراک اور امدادی سرگرمیوں میں حصہ لیں۔
ان کا کہنا تھا کہ سیلاب متاثرین کی بحالی کیلئے قومی جذبے، ایثار اور بھائی چارے کا مظاہرہ کریں۔ یہ وقت یکجہتی اور ہمدردی کا ہے، متاثرین کو احساس دلائیں وہ اکیلے نہیں ہیں۔
سردار ایاز صادق نے یہ بھی کہا کہ مشکل گھڑی میں ایک دوسرے کا سہارا بننا ہمارا قومی فریضہ ہے۔
