فرمان الہی
نماز کے اوقات
بھارت نے دریائے ستلج میں ایک اور سیلابی ریلا چھوڑنے سے متعلق پاکستان کو آگاہ کر دیا۔
بھارت سے فلڈ وارننگ ملنے کے بعد ستلج سے متعلق اضلاع کو ہائی الرٹ کر دیا گیا ہے۔ گنڈا سنگھ کے مقام پر انتہائی اونچے درجے کا سیلاب ہے۔ ملتان میں اکبر فلڈ بند پر پانی کی سطح میں معمولی کمی دیکھی گئی ہے، جبکہ شیر شاہ بند پر پانی کی انتہائی سطح برقرار ہے۔ تحصیل شجاع آباد اور تحصیل جلالپور پیروالا میں مزید درجنوں بستیاں زیر آب آگئی ہیں۔
گنڈا سنگھ کے مقام پر 3 لاکھ 11 ہزار کیوسک سے زائد پانی ریسیو ہو رہا ہے۔ پچھلے 72 گھنٹے سے ہیڈ سلیمانکی کے مقام پر ایک لاکھ 50 ہزار کیوسک پانی چل رہا ہے، یہ پانی اب نیچے بہاولپور، بہاولنگر سے ہوتا ہوا پنچند کے مقام پر پہنچے گا۔
ملتان کے قریب اکبر فلڈ بند کے ہنگامی گیج پر پانی کی سطح کم ہوکر 413.5 فٹ پر آگئی ہے۔ فلڈ فورکاسٹنگ ڈویژن کے مطابق شیرشاہ بند پر پانی کا دباؤ مسلسل برقرار ہے۔ شیر شاہ پل پر پانی کی سطح گزشتہ 36 گھنٹوں سے 394 فٹ پر برقرار ہے۔
تحصیل شجاع آباد اور تحصیل جلالپور پیروالا میں مزید درجنوں بستیاں زیر آب آگئی ہیں، شیر شاہ شجاع آباد اور جلالپور پیروالا میں لوگ سیلابی پانی میں پھنسے ہوئے ہیں۔
جھنگ کی چاروں تحصیلیں جھنگ، اٹھارہ ہزاری، شورکوٹ اور احمد پور سیال کے متعدد دیہات زہر آب آگئیں ہیں، متاثرین سیلاب کی محفوظ مقامات پر منتقلی کا عمل جاری ہے اور 285 دیہات پانی کی زد میں ہیں۔
ڈپٹی کمشنر کا کہنا ہے کہ متاثرین سیلاب میں کھانا اور جانوروں کیلئے چارہ فراہم کیا جا رہا ہے جبکہ سیلاب متاثرہ علاقوں میں طبی سہولیات کی فراہمی کیلئے میڈیکل ٹیمز ادویات کے ہمراہ گشت کررہی ہیں۔
تاندلیانوالہ کے علاقے میں دریائے راوی کا تیزی سے کٹاؤ جاری ہے۔ سیکڑوں ایکڑ اراضی اور فصلیں دریا برد ہو چکی ہیں، متاثرین کو مشکلات کا سامنا ہے۔
بہاولنگر، راجن پور سمیت دیگر سیلاب سے متاثرہ دریائی علاقوں میں متاثرین میں مختلف قسم کی بیماریاں پھیلنا شروع ہوگئی ہیں۔
دریائے ستلج میں گنڈا سنگھ والا پر انتہائی اونچے اور ہیڈ سلیمان کی پر اونچے، راوی میں ہیڈ سدھنائی اور بلوکی پر بہت اونچے اور دریائے چناب میں چنیوٹ کے مقام پر بھی بہت اونچے درجے کا سیلاب ریکارڈ کیا گیا ہے۔
سیلاب سے اب تک پنجاب کے 3900 دیہات ڈوب چکے ہیں، گنڈا سنگھ والا کے مقام پر فصلیں پانی میں ڈوب گئيں، گھروں کو نقصان پہنچا، متاثرین مویشیوں کے ساتھ سڑک پر آگئے۔
بلوکی کے مقام پر بھی سیلاب میں گھرے لوگ پریشان ہیں، مزید دیہات زیر آب آنے کا خدشہ ہے، پنجاب میں سیلاب سے اب تک 39 لاکھ لوگ متاثر ہوئے ہیں، 18 ہزار کو محفوط مقامات پر منتقل کیا گیا، 4 ہزار دیہات ڈوب چکے، کم و بیش 50 افراد جاں بحق ہوئے۔
