• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

طلباء تنظیموں کا 8 ستمبر کی ہڑتال کی حمایت کا اعلان

میرا شہر
کوئٹہ
06 ستمبر ، 2025
کوئٹہ(اسٹاف رپورٹر)بلوچستان کی طلباء تنظیموں پشتونخوا اسٹوڈنٹس آرگنائزیشن ، بلوچ اسٹوڈنٹس آرگنائزیشن (پجار) ، بلوچ اسٹوڈٹنس آرگنائزیشن ، پشتون اسٹوڈنٹس فیڈریشن اور انصاف اسٹوڈنٹس فیڈریشن کے رہنماوں بوہر صالح بلوچ ، صمند بلوچ ، سیف اللہ خان ، طاہر شاہ اور مطیع اللہ نے آل پارٹیز کے رہنماوں کی جانب سے بی این پی کے جلسے کے اختتام پر خودکش حملے میں بے گناہ انسانی جانوں کے ضیاع اور درجنوں کے زخمی ہونے کے واقعے پر 8 ستمبر کو صوبہ بھر میں پہیہ جام اور شٹر ڈاون کی حمایت کا اعلان کرتے ہوئے کہا ہے کہ ہڑتال کو کامیاب بنائیں گے ، یہ بات انہوں نے جمعہ کو کوئٹہ پریس کلب میں مشترکہ پریس کانفرنس کرتے ہوئے کہی ۔ انہوں نے کوئٹہ کے شاہوانی اسٹیڈیم میں جلسہ کے اختتام پر ہونے والے خودکش حملے میں بی این پی کے 15 بے گناہ سیاسی کارکنوں کی شہادت اور 32 سے زائد افراد کے زخمی ہونے کے واقعے کی شدید مذمت کرتے ہوئے کہا کہ یہ حملہ قوم پرست جماعتوں اور قیادت پر تھا جلسہ میں تمام بڑی سیاسی اور قوم پرست جماعتوں کی مرکزی اور صوبائی قیادت سمیت دیگر رہنماء اور ورکز کی بڑی تعداد بھی موجود تھی ۔ حملے میں بلوچستان نیشنل پارٹی کے سربراہ سابق وزیراعلیٰ سردار اختر مینگل ، پشتونخوا ملی عوامی پارٹی کے سربراہ تحفظ آئین پاکستان تحریک کے چیئرمین محمود خان اچکزئی ، نیشنل پارٹی کے سیکرٹری جنرل میر کبیر احمد محمد شہی ، عوامی نیشنل پارٹی کے صوبائی صدر اصغر اچکزئی ، پی ٹی آئی کے صوبائی صدر داود شاہ کاکڑ سمیت دیگر رہنماؤں اور کارکنوں کو نشانہ بنانے کی کوشش کی گئی ۔ انہوں نے کہا کہ آئین و قانون کے تحت ہر شہری کا تحفظ ریاست کی ذمہ داری ہےلیکن یہاں قومی قیادت کو خودکش حملہ آوروں کے رحم و کرم پر چھوڑ دیا گیا ہے حکومت سیاسی قیادت کو تحفظ دینے میں مکمل طور پر ناکام ہے ۔ انہوں نے کہا کہ تمام طلبا تنظیمیں سیاسی جماعتوں سے مکمل اظہار یکجہتی کرتی ہیں عوام اور سیاسی قوتوں کے ساتھ ہر محاذ پر کھڑے رہیں گی ، 8ستمبر کو کو مکمل پہیہ جام اور شٹر ڈاون ہوگا ۔ تمام ورکرز8 ستمبر کی ہڑتال کو کامیاب بنائیں۔
کوئٹہ سے مزید