فرمان الہی
نماز کے اوقات
رحمت اللعالمین، خاتم النبیین، ہادیٔ عالم، نبیٔ کریم حضرت محمد ﷺ کی ولادت کا جشن ملک بھر میں مذہبی عقیدت اور احترام کے ساتھ منایا گیا۔
ملک بھر کی فضاؤں میں درود و سلام کی صدائیں دن بھر گونجتی رہیں، مساجد، عمارتیں، گلیاں، محلے، چوک، چوراہے خوبصورتی سے سجائے گئے اور آقائے دو جہاں سے محبت و عقیدت کا اظہار کیا گیا۔
عیدِ میلاد النبی ﷺ کے دن کا آغاز وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی سے ہوا۔
نمازِ فجر کے بعد مساجد اور گھروں میں ملکی ترقی، سلامتی، خوش حالی اور امتِ مسلمہ کے اتحاد کے لیے خصوصی دعائیں مانگی گئیں۔
کراچی میں عیدِ میلاد النبیﷺ کی مناسبت سے جماعتِ اہلسنت، سنی تحریک اور دیگر جماعتوں کی جانب سے ریلیاں اور جلوس نکالے گئے۔
مرکزی جلوس میمن مسجد سے برآمد ہوا، جس میں وزیرِ اعلیٰ اور گورنر سندھ بھی شریک ہوئے۔
مرکزی جلسہ نشترپارک میں ہوا جس سے سربراہِ جماعتِ اہلسنت شاہ عبدالحق قادری، علامہ کوکب نورانی اوکاڑوی، حاجی حنیف طیب، ثروت اعجاز قادری اور دیگر علمائے کرام نے خطاب کیا۔
کراچی میں گلی محلے، سڑکیں چوراہے سرکار کی آمد مرحبا کے نعروں اور نعتوں سے گونج اُٹھے۔
شہر میں جماعتِ اہلسنت اور دیگر مذہبی جماعتوں کی جانب سے ریلیاں اور جلوس نکالے گئے، جن میں شمعِ رسالت کے ہزاروں پروانے شریک ہوئے۔
جماعتِ اہلسنت کے تحت نیو میمن مسجد ایم اے جناح روڈ سے ریلی نکالی گئی، جس کی قیادت شاہ عبدالحق قادری نے کی۔
ریلی میں وزیرِ اعلیٰ سندھ مراد علی شاہ، گورنر سندھ کامران ٹیسوری، متحدہ قومی موومنٹ کے رہنما و وفاقی وزیر مصطفیٰ کمال اور دیگر بھی شریک ہوئے۔
انجمن رضائے غوثیہ کے تحت عیدِ میلاد النبی ﷺ کا جلوس آرام باغ سے برآمد ہوا جس کی قیادت علامہ اصغر درس نے کی۔
شہر کے مختلف علاقوں سے نکلنے والی تمام ریلیاں اور جلوس نشتر پارک پر آ کر یکجا ہوئِے۔
مرکزی جلوس جماعتِ اہلسنت کے تحت میمن مسجد سے برآمد ہوا عید میلادالنبیﷺ کا مرکزی جلسہ نشتر پارک میں ہوا۔
جس سے سربراہ جماعت اہلسنت شاہ عبدالحق قادری، علامہ کوکب نورانی اوکاڑوی، حاجی حنیف طیب، ثروت اعجاز قادری اور دیگر علمائے کرام نے خطاب کیا۔
سنی تحریک کے تحت رہنما شاداب رضا نقشبندی کی قیادت میں ریلی مرکز اہلسنت سے نکالی گئی، ریلی کے شرکاء ایم اے جناح روڈ سے ہوتے ہوئے نمائنش چورنگی پہنچے جہاں رہنماؤں نے خطاب کیا۔
جمعت علمائے پاکستان کے تحت کورنگی اور انجمن محمدیہ کے تحت شاہ فیصل کالونی میں بھی جلوس نکالے گئے جبکہ دیگر شہروں سے بھی مختلف مذہبی جماعتوں کی جانب سے ریلیاں نکالی گئی، اس موقع پر لنگر کی تقسیم اور سبیلوں کا اہتمام بھی کیا گیا۔
