فرمان الہی
نماز کے اوقات
حکمران جماعت مسلم لیگ (ن) کے سینیٹر پرویز رشید نے کہا ہے کہ آزاد کشمیر میں جو ہوا، اس صورتحال کا پیدا ہونا ہی افسوسناک ہے۔
جیو نیوز سے گفتگو میں پرویز رشید نے کہا کہ دنیا جانتی ہے کہ کشمیریوں کے دل پاکستانیوں کے ساتھ دھڑکتے ہیں، اہل کشمیر بھی جانتے ہیں کہ اُن کی آزادی کےلیے پاکستان نے قربانیاں دی ہیں۔
انہوں نے کہا کہ پاکستان میں حکومت کےلیے مسائل بنتے ہیں لیکن کشمیر میں کبھی مسئلہ نہیں بنا۔
ن لیگی سینیٹر نے مزید کہا کہ کشمیر کی نمائندہ جماعتیں عوام کی نمائندگی کئی دہائیوں سے کرتی آرہی ہیں، ان پارٹیوں کو کونے کھدرے میں کردیا گیا ہے۔
اُن کا کہنا تھا کہ مشین سے اپنا من پسند چوزہ نکال کر اسے وزیراعظم بنا دیا گیا، اس شخص کو نہ کشمیری عوام جانتے تھے نہ اس پر اعتماد کرتے تھے۔
پرویز رشید نے یہ بھی کہا کہ اس کی حکومت ناکام ہوئی توایک اور چوزہ نکال کر وزیراعظم بنا دیا گیا، حقیقی جماعتیں جب میدان میں آئیں تو معاملہ دو دن میں ختم ہوگیا، ہمیں آزاد کشمیر میں اس طرح کے تجربات سے گریز کرنا چاہیے۔
