فرمان الہی
نماز کے اوقات
پاکستانی شوبز انڈسٹری سے وابستہ معروف اداکار فیروز خان نے اسلام کی خاطر شوبز چھوڑنے کا اعلان کیوں کیا تھا اور کس چیز نے انہیں ایسا کرنے پر متاثر کیا، اداکار نے سب کچھ کھل کر بیان کر دیا۔
حال ہی میں اداکار نے ایک پوڈکاسٹ میں بطور مہمان شرکت کی جہاں انہوں نے ذاتی زندگی، کیریئر، روحانی معاملات سمیت مختلف امور پر اپنے خیالات پیش کیے۔
ایک سوال کا جواب دیتے ہوئے انہوں نے کہا کہ زندگی میں ایک وقت ایسا بھی آیا جب میں نے شوبز چھوڑنے کا فیصلہ کیا۔
انہوں نے کہا کہ مجھے لگتا ہے کہ میں نے بہت چھوٹی عمر میں شہرت دیکھی لی تھی اور آج جب میں پیچھے مڑ کر دیکھتا ہوں تو مجھے اپنے ان فیصلوں پر فخر محسوس ہوتا ہے۔ میرے وہ فیصلے مجھے یاد دلاتے ہیں کہ شہرت اور پیسے سب بےمعنی ہیں، ان کی کوئی اہمیت نہیں ہے۔ میں اپنا انسٹاگرام ڈیلیٹ کرنے سے بےروزگار نہیں ہوجاؤں گا۔
اداکار نے کہا کہ لوگوں کو میری سوشل میڈیا پر موجودگی کی نہیں بلکہ میری ضرورت ہے، اس سفر نے مجھے سکھایا کہ کوئی بھی کیریئر مجھے بیان نہیں کرسکتا، اگر میری قسمت میں پیسہ اور شہرت لکھی ہے تو میں کسی بھی شعبے میں رہوں مجھے وہ مل کر رہے گی۔
انہوں نے کہا کہ میری زندگی میں کبھی کوئی ٹرنگ پوائنٹ نہیں رہا، میرا پہلا پروجیکٹ ’چپ رہو‘ کامیاب رہا، اس کے بعد خانی، عشقیہ سمیت کئی ڈرامے ہٹ رہے، اب مجھے پتہ ہے کہ مجھے اس چیز کی فکر نہیں ہے کہ میرا کوئی پروجیکٹ ہٹ ہو گا یا نہیں، بلکہ میں یہ جانتا ہوں کہ میں آنے والے 20 سال تک اپنے اسٹارڈم کے ثمرات سے لطف اندوز ہو سکتا ہوں۔
واضح رہے کہ ذاتی زندگی کے تنازعات سے قبل فیروز خان نے 2019 میں عمرہ ادا کرنے کے بعد مارچ 2020 میں دین کی خاطر شوبز انڈسٹری کو خیرباد کہہ دیا تھا۔ تاہم اداکار جلد ہی حبس سمیت مختلف پروجیکٹس سے اسکرین پر واپس لوٹ آئے تھے۔
