فرمان الہی
نماز کے اوقات
برطانوی شاہی خاندان کی بہو ڈچس آف سسیکس اور امریکی اداکارہ میگھن مارکل نے اپنے والد تھامس مارکل سے ملاقات کے لیے ایسی شرائط عائد کی ہیں جن کی وجہ سے اب دونوں کے دوبارہ ملنے کے امکانات انتہائی کم ہو گئے ہیں۔
بین الاقوامی میڈیا کے مطابق میگھن مارکل نے واضح شرط رکھی ہے کہ اگر اِن کے والد کو ملاقات کرنی ہے تو وہ خود اِن کے پاس سفر کر کے آئیں گے۔
میگھن مارکل کی اس شرط کو تھامس مارکل کی موجودہ صحت کے پیش نظر تقریباً ناممکن سمجھا جا رہا ہے، تھامس مارکل کی عمر 81 سال ہے اور حال ہی میں فلپائن میں علاج کے دوران اِن کی ایک ٹانگ کاٹنا پڑی تھی۔
بین الاقوامی میڈیا میں دعویٰ کیا جا رہا ہے کہ میگھن نے یہ شرط بھی رکھی ہے کہ ملاقات سے پہلے والد کی جانب سے تحریری یقین دہانی کروائی جائے گی کہ وہ اس ملاقات کے بارے میں کبھی میڈیا سے بات نہیں کریں گے۔
غیر ملکی میڈیا کے مطابق یہ شرط کسی بھی والد کے لیے بہت مشکل اور توہین آمیز سمجھی جا رہی ہے۔
ان شرائط کے باعث میگھن اور تھامس مارکل کے درمیان دوبارہ ملاقات کا امکان تقریباً ختم ہو چکا ہے اور بظاہر یہی میگھن کی خواہش بھی ہے۔
واضح رہے کہ میگھن مارکل اور اِن کے والد کے تعلقات 2018ء سے کشیدہ ہیں جب یہ انکشاف ہوا تھا کہ تھامس مارکل نے میگھن کی شادی سے قبل شہرت حاصل کرنے کے لیے خود ساختہ پاپارازی سے تصاویر بنوائی تھیں۔
