فرمان الہی
نماز کے اوقات
بھارتی سابقہ ٹینس اسٹار ثانیہ مرزا نے انکشاف کیا ہے کہ اپنے کیریئر کے عروج کے دوران ذاتی زندگی کے مسائل کے سبب وہ ڈپریشن کا شکار ہوگئی تھیں۔
غیر ملکی میڈیا رپورٹس کے مطابق ثانیہ مرزا نے ذہنی صحت کی اہمیت کو اُجاگر کرتے ہوئے اپنے پوڈکاسٹ میں گفتگو کی، اپنے تجربات کھل کر بیان کیے اور بھارتی خاتون کرکٹر جمیما روڈریگز کی جرات کو سراہا۔
حال ہی میں ویمنز کرکٹ ورلڈکپ 2025 کے سیمی فائنل کے دوران کرکٹر جمیما روڈریگز نے بھی اپنی اینزائٹی سے متعلق کھل کر اظہار کیا تھا، جس کے بعد سابقہ ٹینس اسٹار نے انہیں سراہاتے ہوئے ذاتی ذہنی صحت کے مسائل پر بات کی۔
انہوں نے کہا کہ ذہنی صحت کے مسائل پر توجہ دینا اہمیت کا حامل ہے، یہ بہت ضروری ہے، میں نے اپنی زندگی میں اس پر بہت دیر میں توجہ دی کیونکہ مجھے اس حوالے سے آگاہی نہیں تھی۔
انہوں نے کہا کہ پچھلے 8 سے 10 برسوں کے دوران لوگوں نے ذہنی صحت کو اہمیت اور اس پر کھل کر بات کرنا شروع کی ہے۔ اس سے قبل معاشرے میں اس حوالے سے غلط فہمیاں موجود تھیں، کئی لوگ اس پر بات کرنے سے گریز کرتے تھے۔ مجھے خوشی ہے کہ اب یہ رجحان ختم ہو رہا ہے۔
ثانیہ مرزا نے کہا کہ ہم جیسے لوگ، جن کی آواز نسبتاً زیادہ سنی جاتی ہے، ہماری ذمہ داری بنتی ہے کہ ہم ان موضوعات پر بات کریں جن پر عموماً خاموشی اختیار کی جاتی ہے۔ مجھے خوشی ہے کہ میں نے اس پر بات کی۔
سابقہ کھلاڑی نے اپنی ذاتی مسائل پر بات کرتے ہوئے کہا کہ میں خود بھی اس مرحلے سے گزری ہوں۔ ایک وقت تھا جب میں ڈپریشن میں مبتلا تھی، ٹینس کورٹ کے باہر مجھے کئی مسائل و مشکلات کا سامنا تھا، جن سے میں نمٹ رہی تھی۔ یہ وہ وقت تھا جب میں اپنے کیریئر کے عروج پر تھی۔ میں اپنے مشکل وقت میں اس پر بات نہیں کرسکتی لیکن مجھے خوشی ہے کہ جمیما نے اس پر کھل کر بات کی۔
انہوں نے یہ بھی کہا کہ جب پوری دنیا کی نظریں آپ پر ہوں تو خود کو کمزور ظاہر کرنے کے لیے حوصلے کی ضرورت ہوتی ہے، اور عروج کے لمحے میں ایسا کرنا اور بھی مشکل ہوتا ہے۔ میں جمیما کی کیفیت کو سمجھ سکتی ہوں۔
انہوں نے امید ظاہر کی جمیما کی ہمت سے دیگر کھلاڑیوں کو بھی احساس ہوگا کہ ذہنی صحت پر بات کرنا اس کے لیے مدد لینا باعثِ شرمندگی یا کمزوری نہیں ہے۔
