ملک کےمختلف حصوں میں گزشتہ دو ہفتوں کےدوران بارشوں اور سیلابی ریلوں کے باعث 53 افراد جاں بحق ہوگئے۔ گزشتہ دو روز کے دوران 16 ہلاکتیں اس کے علاوہ ہیں۔
نیشنل ڈیزاسٹر مینجمنٹ اتھارٹی نے 26 جون سے 10 جولائی کے دوران مون سون بارشوں اور سیلابی ریلوں کےسبب ہونے والی ہلاکتوں کی رپورٹ جاری کردی۔
رپورٹ کے مطابق بلوچستان میں 17 ،پنجاب 14، سندھ 6 ، خیبرپختونخوا 7 ،آزادکشمیر 5 اور فاٹا میں 4 افراد بھی ہلاک اور خواتین اور بچوں سمیت 64 افراد زخمی ہوئے، اس دوران 62 گھروں کو بھی نقصان پہنچا۔
این ڈی ایم اے کے مطابق مون سون بارشوں کے باعث تربیلا اور منگلا ڈیم میں پانی کی سطح تیزی سے بلند ہورہی ہے۔
دریائے جہلم میں منگلا کے مقام پر انتہائی اونچے درجےکے سیلاب کا خطرہ ہے جبکہ جہلم اور راوی سے جڑے نالوں میں طغیانی آسکتی ہے۔