فرمان الہی
نماز کے اوقات
اسلام آباد ( آن لائن ) چیف جسٹس میا ں ثاقب نثار نے وفاقی دارالحکومت اسلام آباد کے علاقے میں حساس ادارے کے باہر سڑک کی بندش کا از خودنوٹس لیتے ہوئے سی ڈی اے سے آج جمعہ کو رپورٹ طلب کر لی ہے، چیف جسٹس نے حکم دیا کہ بتایا جائے سڑک کس قانون کے تحت کس نے بند کی، سکیورٹی کے نام پر سڑکیں بند کرنے کی اجازت نہیں دی جائے گی ۔جمعرات کے روز چیف جسٹس نے یہ نوٹس میریٹ اور سرینا ہوٹل کے سامنے سڑک کی بندش سے متعلق کیس کی سماعت کے دوران لیا ہے ، کیس کی سماعت کے دوران چیف جسٹس نے ریمارکس دیئے کہ سیکورٹی کے نام پر سڑکیں بند کرنے کی اجازت نہیں دی جائے گی ، جہاں سکیورٹی خدشات ہیں وہاں سکیورٹی بڑھائی جائے، قانون سب کیلئے برابر ہے، میریٹ ہوٹل کے وکیل نعیم بخاری نے موقف اختیار کیا کہ ہوٹل کے باہر سے تجاوزات ہٹانے سے پہلے ہمیں سنا نہیں گیا،تو چیف جسٹس نے کہا کہ ہم نے سڑکیں اور راستے کھلوانے ہیں، نعیم بخاری نے کہا کہ دہشت گردی ختم نہیں ہوئی، تو چیف جسٹس نے کہا کہ اللہ خیر کرے گا دہشت گردی ختم ہو رہی ہے دوران سماعت ایک وکیل نے استدعا کی کہ راولپنڈی کینٹ میں بھی کئی سڑکیں بند ہیں،اس معاملے کو بھی دیکھا جائے، تو چیف جسٹس نے کہا کہ آپ ایک درخواست سپریم کورٹ میں دائر کر دیں اس معاملے کو بھی دیکھ لیں گے،بعد ازاں عدالت نے حساس ادارے کے باہر سڑک کی بندش کا نوٹس لیتے ہوئے سی ڈی اے سے رپورٹ طلب کر لی اور حکم دیا کہ بتایا جائے سڑک کس قانون کے تحت کس نے بند کی۔ سی ڈی اے بتائے ادارے نے خود کتنی تجاوزات قائم کر رکھی ہیں، سی ڈی اے کا کام تجاوزات ختم کرنا ہے نا کہ تجاوزات قائم کرنا ہے ۔
