راؤانوار کو جیل بھیج دیا گیا

21 اپریل ، 2018

نقیب قتل کیس: راؤانوار کو عدالتی ریمانڈ پرجیل بھیج دیا گیا

راؤانوار کو عدالتی ریمانڈ پر 2مئی تک جیل بھیج دیا گیا

نقیب اللہ قتل کیس کی کراچی کی انسداددہشت گردی عدالت میں سماعت ہوئی،سابق ایس ایس پی ملیر راؤ انوارکو سخت سیکیورٹی میں عدالت پہنچایا گیا۔

کراچی کی انسداددہشت گردی عدالت نے نقیب اللہ محسود قتل کیس میں راؤانوار اورملزم شکیل کو عدالتی ریمانڈ پر 2مئی تک جیل بھیج دیا ۔

عدالت نے جبکہ ڈی ایس پی قمر سمیت 11ملزمان کے عدالتی ریمانڈ میں توسیع کردی ہے۔

اس سے قبل دورانِ سماعت تفتیشی افسر نے راؤانوار کو عدالتی ریمانڈ پرجیل بھیجنے کی سفارش کی اور عدالت سے درخواست کی کہ کیس کا فائنل چالان جمع کرانے کے لیے ایک ہفتےکی مہلت دی جائے۔

تفتیشی افسر کا کہنا تھا راؤانوار کے خلاف جے آئی ٹی تشکیل دے دی گئی ہے، اس کی سفارش کے بعد فائنل چالان جمع کرایا جائے گا۔

واضح رہے کہ نقیب اللہ قتل کیس میں گرفتارسابق ایس ایس پی ملیرراؤانوار کا جسمانی ریمانڈ مکمل ہوگیا تھا جس کے بعد انہیں آج عدالت میں پیش کیاگیا۔

ذرائع کے مطابق ملزمان سے اب تک ہونے والی تحقیقاتی رپورٹ بھی عدالت میں پیش کی گئی ہے۔

تفتیشی افسر ڈاکٹر رضوان کے مطابق تاحال انویسٹی گیشن مکمل نہ ہونے پر جے آئی ٹی نے اپنی رپورٹ جمع نہیں کرائی ہے۔

نقیب اللہ قتل کیس میں سابق ایس ایس پی ملیر راؤ انوار سمیت 10ملزمان گرفتار ہیں،اس سے پہلے عدالت نے راؤانوار کو 30 روز کیلئےجسمانی ریمانڈ پر پولیس کے حوالے کیا تھا۔

واضح رہے کہ رواں برس 13 جنوری کو ملیر کے علاقے شاہ لطیف ٹاؤن میں سابق ایس ایس پی ملیر راؤ انوار نے نقیب اللہ محسود کو دیگر 3 افراد کے ہمراہ دہشت گرد قرار دے کر جعلی مقابلے میں مار دیا تھا۔

تازہ ترین