امریکی سفارت خانے کی مقبوضہ بیت المقدس منتقلی کے خلاف احتجاج کرنے والے فلسطینیوں پر اسرائیلی فورسز کی وحشیانہ فائرنگ اور گولہ باری سے شہید ہونے والے فلسطینیوں کی تعداد 58 ہوگئی۔
فلسطینی وزارت صحت کے مطابق اسرائیلی فورسز نے غزہ پٹی سے ملحقہ سرحد پر اکٹھے ہونے والے ہزاروں فلسطینیوں پر شدید اندھادہند فائرنگ اور گولہ باری کی جس کے نتیجے میں 2410 فلسطینی شدید زخمی بھی ہوئے ہیں جن میں سے درجنوں کی حالت نازک بتائی جارہی ہے۔
ادھر اقوام متحدہ میں فلسطینی مندوب ریاض منصور نے بتایا ہے کہ اسرائیلی درندگی سے شہید ہونے والوں میں 16 بچے بھی شامل ہیں۔
دریں اثناء اسرائیلی فوج کا کہنا ہے کہ غزہ میں حماس کے ٹھکانوں پر اسرائیلی جنگی طیاروں نے بمباری بھی کی ہے اور حملے میں پانچ ملٹری ٹریننگ سینٹرز کو نشانہ بنایا گیا جبکہ غزہ کی پٹی کے سرحدی علاقے میں پرتشدد مظاہروں کے ردعمل میں حماس کے ٹھکانوں کو نشانہ بنایا گیا ہے۔