محمدبن سلمان کا شہزادے سے ولی عہد بننے کا سفر

ریاض(اے پی پی) سعودی ولی عہد شہزادہ محمد بن سلمان31 اگست 1985ءکو پیدا ہوئے تھے‘وہ موجودہ بادشاہ سلمان بن عبدالعزیز السعود کی تیسری اہلیہ فہدہ بن فلاح کے سب سے بڑے صاحبزادے ہیں ۔ ریاض کی کنگ سعود یونیورسٹی سے بیچلرز کی ڈگری حاصل کرنے کے بعد شہزداہ محمد نے کئی سرکاری اداروں میں کام کیا۔ اْن کے دو بیٹے اور دو بیٹیاں ہیں۔انھیں 2009 میں اپنے والد کا مشیرِ خصوصی مقرر کیا گیا جو اْس وقت ریاض کے گورنر تھے۔انہیں 21جون 2017ء کو ولی عہد مقررکیاگیا‘ولی عہد کے پاس نائب وزیرِ اعظم کے ساتھ ساتھ وزیر دفاع کا عہدہ بھی ہے۔ شہزادہ محمد 29 برس کی عمر میں دنیا کے سب سے نو عمر وزیر دفاع بنے تھے ‘محمد بن سلمان کے وزارتِ دفاع کا قلمدان سنبھالتے ہی سعودی عرب نے یمن میں عملی طور پر جنگی کارروائیاں شروع کیں‘اب نوجوان سعودی ولی عہد کی پوزیشن مضبوط سے مضبوط تر ہو گئی ہے ۔