خواجہ آصف کا وزیر اعظم پر طنز

مسلم لیگ نون کے رہنما خواجہ آصف نے وزیر اعظم عمران خان کے قبائلی علاقوں کے جغرافیے اور تاریخ جاننے سے متعلق دعوے پر اپنے رد عمل کا اظہار کرتے ہوئے کہا ہے کہ جس طرح انہیں جاپان اور جرمنی کی تاریخ و جغرافیہ سے مکمل واقفیت اور جانکاری ہے۔

سماجی رابطے کی ویب سائٹ ٹوئٹر پر خواجہ آصف نے اپنے پیغام میں جیو نیوز کے آفیشل اکاؤنٹ سے وزیر اعظم کے بیان پر مبنی ایک ٹویٹ کو بھی شیئر کیا ہے جس کا جواب دیتے ہوئے انہوں نے وزیر اعظم کو اپنے طنز کا نشانہ بنایا ہے۔

واضح رہے کہ جاپان اور جرمنی کو ہمسایہ ملک قرار دینے سے متعلق بیان پر مختلف سیاستدانوں کی جانب سے وزیر اعظم عمران خان کو شدید تنقید کا نشانہ بنایا جا رہا ہے۔

اس سے قبل بلاول بھٹو زرداری اور دیگر اپوزیشن رہنما بھی وزیر اعظم کے جاپان جرمنی والے بیان پر ردعمل کے طور پر ٹویٹ کر چکے ہیں۔

اسی طرح حکومتی حلقوں اور وزراء کی جانب سے اس پر وضاحتی بیانات کا سلسلہ بھی جاری ہے۔