اننیا پانڈے نے کارتیک سے محبت کا اعتراف کرلیا

02 مئی ، 2019

بالی ووڈ کی نئی اداکارہ اننیا پانڈے نےبالی ووڈ کے دلکش اداکار کارتیک آریان سے اپنی محبت کا اعتراف کرتے ہوئے اپنے جذبات کا بر ملا اظہار کردیا ہے۔

بھارتی خبر رساں ادارے کے مطابق گزشتہ چند مہینوں سے اداکار کارتیک آریان اور اننیا پانڈےکے حوالے سے بیشتر افواہیں گردش کر رہی تھیں جن کا اننیا نے آخر کار جواب دے ہی دیا۔ اننیا نے ایک انٹرویو میں انکشاف کرتے ہوئے کہا کہ وہ کارتیک آریان کو بے حد پسند کرتی ہیں۔

اننیا نے انٹرویو میں مزید بتایا ہے کہ ’میں اس وقت 20 سال کی ہوں اور اس عمر میں کسی کو پسند کرنا فطری عمل ہے اور ہاں کارتیک مجھے اچھا لگتا ہے اور میں بہت خوش نصیب ہوں کہ مجھے کارتیک کے ساتھ ایک فلم میں کام کرنے کا موقع بھی ملا ہے۔‘

اننیا پانڈے بالی ووڈ کی وہ پہلی اداکارہ نہیں ہیں جنہیں کارتیک آریان اچھے لگتے ہیں بلکہ اس سے قبل اداکارہ سارا علی خان بھی ایک انٹرویو میں کارتیک آریان کے لئے اپنی چاہت کا اظہار کر چکی ہیں۔

اداکارہ سارا علی خان کا کارتیک آریان کے لیے محبت کے اعتراف پر اننیا کا کہنا تھا کہ ’اگر سارا اور کارتیک ایک ساتھ ڈنر پر جائیں گےتو میں ان کے ساتھ جانا چاہوں گی۔‘

واضح رہے کہ اننیا پانڈے بالی ووڈ کے مشہور اداکار چنکی پانڈے کی صاحب زادی ہیں جو کہ بہت جلد ہدایت کار کرن جوہر کی ہدایت کاری میں بننے والی فلم ’اسٹوڈنٹ آف دی ائیر 2‘ میں ڈیبیو کرتی نظر آئیں گی۔ فلم میں ان کے ساتھ اداکار ٹائیگر شروف اور تارا سوتاریا بھی مرکزی کردار ادا کرتے نظر آئیں گے۔

اس کے علاوہ اننیا پانڈے کارتیک آریان کے ساتھ فلم ’پتی پتنی اور وہ‘ بھی سائن کر چکی ہیں، جس میں ان کے ساتھ بالی ووڈ اداکارہ بھومی پڈنیکر بھی اداکاری کریں گی۔

تازہ ترین