کومل رضوی کے گانے ورلڈ میوزک کیٹیگری میں نمبر ون قرار

کومل رضوی کے گزشتہ سال عید کے موقع پر ریلیز ہونے والے اوریجنل گانے ’’او ہیلو جی‘‘ اور اشتراک سے بنایا جانے والا گانا ’’دیساں دا راجا‘‘ نے گانوں کے بین الاقوامی مقابلے کی ورلڈ میوزک کیٹیگری میں نمبر ون پوزیشن حاصل کرلی۔

اس مقابلے میں 140 ممالک سے 19,000گانوں کا اندراج کرایا گیا تھا، جس میں کومل رضوی کے گانے کو سب سے زیادہ پسندیدہ قرار دے کر انہیں فاتح چن لیا گیا۔

اس حوالے سے کومل رضوی کا کہنا تھا کہ اس ایوارڈ کا حصول میرے لیے انتہائی فخر کی بات ہے، بین الاقوامی سطح پر میری محنت اور خدمات کو تسلیم کیا جانا یقینا میرے لیے باعث مسرت اور افتخار ہے۔

انہوں نے کہا کہ میں دنیا بھر میں منعقد ہونے والے مقابلوں میں شرکت کرتی ہوں، جو اس بات کا مظہر ہے کہ میوزک سے مجھے عشق ہے اوریہ میری رگوں میں دوڑتا ہے۔

واضح رہے کہ کومل رضوی، پاکستان کی مشہور گانے لکھنے اور گانے والی فنکارہ کے علاوہ ٹی وی میزبان اور ایکٹر کے طور پر جانی جاتی ہیں، انہوں نے بہت کم عمری میں ہی موسیقی کی دنیا میں اپنی صلاحیتوں کا لوہا منوایا لیا تھا، وہ اپنی خوب صورت آواز اور جان دار وڈیوز کے ذریعے موسیقی کے شائقین کے دلوں میں گھر کرچکی ہیں۔

کومل رضوی نے اپنے کیرئیر کا آغاز گلوکاری سے کیا اور اب تک ان کے تین میوزک البم منظر عام پر آکر مقبولیت کی سند حاصل کرچکے ہیں، ان کے گانوں میں انتہائی معروف گانا ’’دیساں دا راجا‘‘ اور کوک اسٹوڈیو سے شہرت پانے والا گانے ’’دانے پہ دانا، لمبی جدائی ، لال میری ‘‘ نے ان کی شہرت کو چار چاند لگادیئے۔

ان کے گائے ہوئے دیگر مشہور گانوں میں ’’یہی پیار ہے‘ بائو جی ‘ چاہئے‘ دل ربا‘ توجو ملا‘ تو بہہ گیا‘ جب کہ میش اپ ’’ہائو لونگ‘ پہلا پیار ‘ مائی امورٹل اور اعتبار شامل ہیں۔

ان کا تازہ ترین گانا ’’ہیلو جی‘‘میں معروف اداکار یاسر حسین ہیں ، جب کہ گانا’’چٹا چولا‘‘ بھی شہرت حاصل کررہے ہیں، انہوں نے 2018میں معروف بھارتی یوٹیوبر سدھارت سلاٹھیا کے ساتھ ایک ویڈنگ میش اپ بھی پیش کیا ہے ۔

کومل رضوی نہ صرف پاکستان بلکہ بیرونی ممالک بشمول ناروے، کیلی فورنیا، اسکرامینٹو ،ہیوسٹن ،اوہائی،اٹلانٹا ‘نیوجرسی، ڈیلس، وینکووراور ٹورنٹو میں لائیو پرفارمنس کے ذریعے لوگوں کے دل موہ لیے ہیں۔

انٹرنیشنل سونگ رائٹنگ کمپیٹیشن (ISC)ایک ایسا پلیٹ فارم ہے، جو سال میں ایک مرتبہ گانوں کا مقابلہ منعقد کراتا ہے۔ اس کا مقصد گانوں کے لکھاریوں کو بین الاقوامی سطح پر اپنے گانوں کو پہنچانے کا موقع فراہم کرنا ہے۔

آئی ایس سی سونگ رائٹرز کے میوزیکل ٹیلنٹ کو ہر درجہ پر فروغ دینے کے ساتھ سونگ رائٹرز کو آگے آنے میں معاونت کرتا ہے۔