فواد چوہدری کی مفتی منیب، پوپلزئی کو چاند دیکھنے کی دعوت

20 مئی ، 2019

وفاقی وزیر سائنس اینڈ ٹیکنالوجی فواد چوہدری نے مولانا منیب الرحمن اور شہاب الدین پوپلزئی کو چاند دیکھنے کی دعوت دینے کا اعلان کیا ہے۔

سوشل میڈیا پر اپنے بیان میں فواد چوہدری نے کہا کہ وہ مرکزی رویت ہلال کمیٹی کے چیئرمین مولانا منیب الرحمن اور پشاور کی مسجد قاسم علی خان کی رویت ہلال کمیٹی کے سربراہ شہاب الدین پوپلزئی کو دعوت بھیج رہے ہیں کہ وہ تشریف لائیں اور خود دیکھیں کہ چاند کیسے گردش کرتا ہے۔

فواد چوہدری نے ٹوئٹ میں کہا کہ سائنسی بنیادوں پر یہ انتہائی آسان کام ہے،چاند کے اصل مقام کا تعین کیا جا سکتا ہے اور اس کے لیے بہت پاپڑ بیلنے کی ضرورت نہیں۔

واضح رہے کہ وفاقی وزیر فواد چوہدری نے ایک قمری کیلنڈر بنانے کا اعلان کیا تھا جس پر مفتی منیب نے وفاقی وزیر پر برہمی کا اظہار کیا تھا۔

تازہ ترین