دوسری شادی کیلئے مصالحتی کونسل کی اجازت لازمی قرار

24 جون ، 2019

اسلام آباد ہائیکورٹ نے دوسری شادی کیلئے مصالحتی کونسل کی اجازت لازمی قرار دے دی، بیوی کی اجازت کےباوجود مصالحتی کونسل انکار کردے تو دوسری شادی پر سزا ہوگی۔

چیف جسٹس اسلام آباد ہائی کورٹ اطہر من اللہ نے 12 صفحات پر مشتمل کیس کا تحریری فیصلہ جاری کیا جس میں کہا گیا کہ مسلم فیملی لاز آرڈیننس 1961ء کے مطابق اجازت کے بغیر شادی کرنے والے شخص پر سزا اور جرمانہ ہوگا۔

اسلام آباد ہائی کورٹ نے دوسری شادی کیس میں آزاد کشمیر کے رہائشی لیاقت علی میر کو ایک ماہ قید اور 5 ہزار روپے جرمانے کی سزا سنائی، اس سے قبل ایڈیشنل سیشن جج نے کشمیر کا باشندہ ہونے کی وجہ سے لیاقت علی کو بری کیا تھا۔

ایڈیشنل سیشن جج کی جانب سے بری کیے جانے کے فیصلے پر اسلام آباد ہائی کورٹ نے کہا کہ جس شخص کے پاس قومی شناختی کارڈ ہے، اس پر تمام قوانین کا اطلاق ہوگا۔

اسلام آباد ہائی کورٹ نے پہلی بیوی کی اپیل پر لیاقت علی میر کی بریت کو کالعدم قرار دیا اور ماتحت عدالت کو حکم دیا کہ ایڈیشنل سیشن جج میرٹ پر لیاقت علی میر کی دوسری شادی کیس کا فیصلہ کریں۔

اسلام آباد ہائی کورٹ نے اپنے فیصلے میں کہا کہ نکاح اسلام آباد میں رجسٹرڈ ہے، جو عدالت کے مکمل دائرہ اختیار میں ہے۔

واضح رہے کہ دلشاد بی بی اور لیاقت علی میر نے 2011ء میں پسند کی شادی کی تھی، تاہم 2013ء میں لیاقت علی میر نے بیوی اور مصالحتی کونسل کی اجازت کے بغیر دوسری شادی کر لی تھی۔

تازہ ترین