پاکستان کرکٹ کا نیا ڈومیسٹک سیزن شروع ہوگیا، قائد اعظم ٹرافی کے میچز ملک کے 3 گراؤنڈز پر کھیلے جارہے ہیں.
ملکی تاریخ میں پہلی بار بلوچستان نے نو ٹاس کے قانون پر عمل کیا، لیجنڈری اسپنر عبدالقادر کو خراج عقیدت پیش کرنے کے لئے کھلاڑی سیاہ پٹیاں باندھ کر میچ کھیل رہے ہیں۔
قائد اعظم ٹرافی پہلی بار نئے سسٹم کے تحت 6 صوبائی ٹیموں کے درمیان کھیلی جارہی ہے، قذافی اسٹیدیم لاہور میں سدرن پنجاب نے ٹاس جیت کر سینٹرل پنجاب کو بولنگ کی دعوت دی۔
میچ کے آغاز سے قبل لیجنڈری اسپنر عبدالقادر کو خراج عقیدت پیش کرنے کے لیے فاتحہ خوانی کی گئی اور سوگ میں کھلاڑیوں نے سیاہ پٹیاں باندھی، اس موقع پر چیئرمین پی سی بی احسان مانی بھی موجود تھے۔
یو بی ایل اسپورٹس کمپلیکس کراچی پر نئی تاریخ رقم ہوئی جہاں میزبان بلوچستان نے نو ٹاس کے قانون پر عمل کرتے ہوئے پہلے سندھ کی ٹیم کو بیٹنگ کی دعوت دی، یہاں بھی عبدالقادر کو خراج عقیدت پیش کیا گیا۔
میچ سے قبل فاسٹ بولر انور علی نے اسٹیڈیم آنے والے فینز کا شکریہ ادا کیا اور ان کے ساتھ تصاویر بھی بنوائیں۔
دوسری جانب ایبٹ آباد میں بھی کے پی کے اور نادرن کے درمیان میچ بھی کھیلا جارہا ہے۔