چہلم پر کراچی میں فوج تعیناتی کی سفارش

18 اکتوبر ، 2019

سندھ حکومت نے وفاق سے چہلمِ امامِ حسینؓ پر کراچی میں سیکیورٹی بیک اپ سپورٹ پر فوج کی تعیناتی کے لیے صوبائی محکمۂ داخلہ نے وزارتِ داخلہ کو خط لکھ دیا ہے۔

صوبائی محکمۂ داخلہ کی جانب سے لکھے گئے خط میں سفارش کی گئی ہے کہ کراچی سمیت سندھ بھر میں فوج، رینجرز اور ایف سی کو چہلمِ امامِ حسینؓ کے موقع پر تعینات کیا جائے۔

سندھ حکومت کا کہنا ہے کہ خط کی منظوری کی صورت میں فوجی اہلکار کراچی کے حساس علاقوں سمیت جلوس کے روٹ پر تعینات کیے جاسکتے ہیں۔

واضح رہے کہ منگل 15 اکتوبر کو ہیڈ کوارٹرز پاکستان رینجرز (سندھ) میں ڈی جی رینجرز (سندھ) میجر جنرل عمر احمد بخاری کی زیرِ صدارت اعلیٰ سطح کا سیکیورٹی اجلاس منعقد ہوا تھا جس میں کمشنر کراچی، ایڈیشنل آئی جی کراچی، پولیس، رینجرز اور حساس اداروں کے اعلیٰ افسران نے شرکت کی تھی۔

اجلاس میں چہلم حضرت امام حسینؓ کے حوالے سے سیکیورٹی پلان کا جائزہ لیا گیا تھا تاکہ کسی بھی ممکنہ دہشت گردی سے مؤثر انداز میں نمٹا جا سکے۔

تازہ ترین