قبر کے کتبے پر آیاتِ قرآنی لکھوانا کیسا عمل ہے؟

22 نومبر ، 2019

تفہیم المسائل

سوال: قبر کے کتبے پر قرآنی آیات وغیرہ لکھوانا کیسا عمل ہے ؟(معاذ احمد، راول پنڈی)

جواب:صرف ضرورت کے لئے یعنی قبر کے آثارمحفوظ رہیں یاشناخت وعلامت کے طور پر مُتوفّٰی کا نام کندہ کرانے میں حرج نہیں ہے، تاکہ قبر کے آثار باقی رہیں اور اس کی اہانت نہ ہو ،اِس کے علاوہ قرآن مجید کی آیات یا اشعارلکھوانا یا مبالغہ آرائی پر مبنی تحریر مکروہ ہے ۔ علامہ ابن عابدین شامی لکھتے ہیں:ترجمہ:’’ یہاں تک کہ قبر پر قرآن مجید (کی آیات) لکھنا یا اَشعار یا (صاحبِ قبر کی )تعریف میں مبالغہ آرائی کے کلمات لکھنا مکروہ ہے ،(ردالمحتار علیٰ الدرالمختار ،جلد3،ص:135)‘‘۔ڈاکٹر وھبہ الزحیلی لکھتے ہیں :ترجمہ:’’ قبر پر لکھنا جمہور علماء کے نزدیک مکروہ ہے ،خواہ صاحبِ قبر کا نام ہو یا کسی اورکا ، خواہ سرہانے کی طرف لکھے یا کسی اور جگہ یا اُس کے نام کوئی پرچہ یا تحریر لکھ کر سوراخ میں رکھ دی جائے ،اصحابِ مالکیہ کے نزدیک قبر پر قرآن مجید (کی آیات) لکھنا حرام ہے اور اُس کی دلیل یہ (حدیث) ہے : جسے حضرت جابر رضی اللہ عنہ نے بیان کیا: رسول اللہ ﷺ نے قبروں کو پختہ کرنے ،اُن پر لکھنے اور اُن پر عمارت بنانے سے منع فرمایا، (صحیح مسلم :970)۔احناف کہتے ہیں: اگر ضرورت ہو توقبر پر لکھنے میں کوئی حرج نہیں ہے ،تاکہ قبر کا نشان محفوظ رہے اور اُس کی اِہانت بھی نہ ہو ‘‘۔ مزید لکھتے ہیں :ترجمہ:’’ خلاصہ یہ ہے کہ( قبر پر )لکھنے کی ممانعت کو بلاضرورت لکھنے پر محمول کیاجائے یعنی جبکہ لکھنا ضرورت کے بغیر ہے ، قرآن مجید (کی آیات) یا اَشعار لکھنا یاصاحبِ قبر کی تعریف میں مبالغہ آرائی کے کلمات لکھنا مکروہ ہے ، (فقہ الاسلامی وأدلتہٗ ، جلد2، ص:1553)‘‘۔

تازہ ترین