آپ آف لائن ہیں
جنگ ای پیپر
منگل25؍جمادی الاوّل 1441ھ 21؍جنوری 2020ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
تازہ ترین
آج کا اخبار
کالمز

APS شہداء کا غم ہمیشہ صدمہ رہے گا، بلاول


پاکستان پیپلز پارٹی کے چیئرمین بلاول بھٹو زرداری نے سانحہ آرمی پبلک اسکول کی پانچویں برسی کے موقع پر معصوم شہداء اور اساتذہ کو خراج عقیدت پیش کرتے ہوئے کہا کہ شہداء کا غم ہمارے لیے ہمیشہ باعث صدمہ رہے گا۔

پی پی چیئرمین بلاول بھٹو زرداری نے سانحہ آرمی پبلک اسکول پشاور کی 5 ویں برسی پر اپنے پیغام میں کہا ہے کہ انتہا پسندی و دہشت گردی درحقیقت امن و ترقی کی دشمن ہوتی ہے، دہشت گردوں کے سہولت کار اور سرپرست انسانیت کے مجرم ہیں۔

انہوں نے کہا کہ مذموم مقاصد کے حصول کی خاطر انتہا پسندی و دہشت گردی کو بطور آلہ استعمال کیا گیا، اس کا مقصد مخصوص ایجنڈا مسلط کرنے کے لیے پوری قوم کو یرغمال بناکر شہریوں کو خوف میں مبتلا رکھنا تھا۔

بلاول بھٹو نے مزید کہا کہ پیپلز پارٹی کا دہشت گردی کے خلاف ہمیشہ دو ٹوک موقف رہا ہے اور اسی کی پاداش میں پیپلز پارٹی کو بہت قربانیاں دینا پڑی ہیں، پی پی قیادت سمیت بے شمار کارکنان کو اس جنگ کے دوران شہید کیا جاتا رہا ہے۔

ان کا کہنا تھا کہ آرمی پبلک اسکول کے شہداء کا غم ہمارے لیے ہمیشہ باعث صدمہ رہے گا، جب تک ملوث قوتوں سے نبرد آزما نہیں ہونگے تب تک یہ سانحہ ہماری تاریخ میں ایک دھبہ رہے گا ، ہماری خصوصاً ان قوتوں کے خلاف لڑائی ہے جنہوں نے دہشت گردی کی آبیاری کی۔

بلاول نے کہا کہ دہشت گردوں اور ان کے آمر سرپرستوں کے خلاف جدوجہد کے دوران قوم نے بہت بڑی قیمت ادا کی ہے ، دہشت گردی کے ہاتھوں اپنی جان گنوانے والے 60 ہزار بے گناہ شہریوں میں شہید محترمہ بینظیر بھٹو کا خون بھی شامل ہے۔

شہید بی بی کو دہشت گردی اور اس کی پرورش کرنے والی آمریت کے خلاف سینہ سپر ہونے کی پاداش میں قتل کیا گیا مگر اس کے باوجود پیپلز پارٹی انتہا پسندی و دہشت گردی کے خلاف جنگ میں ہر اول دستے کا کردار نبھاتی رہی ہے۔

چیئرمین پی پی نے کہا کہ ہماری جماعت ہمیشہ مساوات پر مبنی، پر امن، خوشحال اور ترقی پسند پاکستان کے لیے سرگرم عمل رہی ہے ، پاکستان پیپلز پارٹی تمام پاکستانیوں کے حقوق کی لڑائی لڑتی رہے گی۔

قومی خبریں سے مزید