پنجاب، خیبر پختونخوا فلور ملز ایسوسی ایشنز کا کل سے ملز بند کرنے کا اعلان

پنجاب اور خیبر پختونخوا کی فلور ملز ایسوسی ایشنز نے کل سے ملز بند کرنے کا اعلان کردیا۔

پنجاب کی ایسوسی ایشن کے چیئرمین عبدالرؤف مغل کا کہنا ہے کہ جنوبی پنجاب میں ملز پر چھاپے مارے جارہے ہیں اور انہیں سیل کیا جارہا ہے۔

انہوں نے کہا کہ مطالبات تسلیم کیے جانے تک ہڑتال جاری رہے گی۔

فلور ملز ایسوسی ایشن کا کہنا ہے کہ ملز سے زبردستی گندم اٹھائی جارہی ہے۔

دوسری جانب کے پی فلور ملز مالکان کا کہنا ہے کہ ایک ماہ سے پنجاب سے خیبر پختونخوا کو گندم کی فراہمی بند ہے۔

انہوں نے کہا کہ گندم کی ترسیل پر پابندی کے خلاف احتجاجاً ہڑتال پر مجبور ہوگئے ہیں۔

دوسری جانب رحیم یار خان میں بھی آٹا ملز ایسوسی ایشن نے پیر سے ہڑتال کا اعلان کردیا ہے۔

صدر آٹا ملز ایسوسی ایشن محمود درانی کا کہنا ہے کہ خریداری ہدف پورا ہونے کے باوجود خریداری کرنےنہیں دی جارہی، گندم کی خریداری پر پابندی کے باعث 32 آٹا ملیں بند ہوگئی ہیں۔

محمود درانی نے خبردار کیا کہ آنے والے وقت میں آٹے کے بحران کی ذمہ دار حکومت خود ہوگی۔