27 ویں شب کو ملک بھر میں خصوصی عبادات کا اہتمام

21 مئی ، 2020

ہزار مہینوں سے بہتر رات ’شبِ قدر‘ کی تلاش میں ستائیسویں شب کو ملک بھر میں خصوصی عبادات کا اہتمام کیا گیا، گھروں اور مساجد میں ذکر و اذکار، تلاوت قرآن پاک اور نوافل پڑھے گئے۔

ملک بھر میں شہریوں نے خشوع و خضوع کے ساتھ عبادات اور دعائیں کیں جبکہ مختلف مساجد میں ختم القرآن اور شبینہ کی محافل کا بھی اہتمام کیا گیا۔

لاہور کی مساجد میں رمضان المبارک کی 27 ویں شب میں ختم قرآن کی محافل کا انعقاد کیا گیا، مساجد میں خصوصی عبادات کے ساتھ ملک کی سلامتی اور کورونا وائرس سے نجات کے لیے خصوصی دعائیں مانگی گئیں۔

ماہ صیام کے آخری عشرے میں شب قدر کے موقع پر ملک بھر کی طرح کراچی بھر کی مساجد میں بھی عبادات کا اہتمام کیا گیا ہے۔

پشاور کی مساجد میں کورونا وائرس کے باعث ماہ رمضان کی 27 ویں شب کو وہ رونقیں نہیں جو ہر سال ہوتی تھیں تاہم اس کے باوجود نمازیوں نے مساجد میں نمازیں اور تراویح ادا کی۔

حیدرآباد میں بھی رمضان المبارک کی ستائیسویں شب پر خصوصی عبادات کا اہتمام کیا گیا۔

لاہور کی تاریخی بادشاہی مسجد میں ختم قرآن کی تقریب میں صوبائی وزیر اوقاف سعید الحسن شاہ نے شرکت کی، انہوں نے علماء کرام میں تحائف تقسیم کیے اور ملکی سلامتی اور ترقی کے لیے دعا بھی کرائی۔

تازہ ترین