عید گھروں میں رہ کر سادگی سے منائیں، شہباز شریف

قائد حزبِ اختلاف قومی اسمبلی و مسلم لیگ ن کے صدر محمد شہباز شریف نے قوم سے اپیل کی ہے کہ طیارہ حادثے اور کورونا وائرس کے باعث عید گھروں میں رہ کر سادگی سے منائیں۔

شہباز شریف نے اپنے پیغام میں کہا کہ بدقسمتی سے اس برس عید رنجیدہ ماحول میں آئی ہے، ایک طرف جہاز کے حادثے میں ہونے والی شہادتیں تو دوسری جانب کورونا وائرس کی وجہ سے ضائع ہونے والی قیمتی زندگیاں ہیں۔

انہوں نے کہا کہ لاکھوں لوگ مشکلات میں گھرے ہوئے ہیں، ﷲ کریم سے دعائیں مانگنے کے سوا کوئی چارہ نہیں۔