سانحۂ بلدیہ: ملزم زبیر چریا کے وکیل سے حتمی دلائل طلب

30 مئی ، 2020

سانحہ بلدیہ: ملزم زبیر چریا کے وکیل سے حتمی دلائل طلب

کراچی کی انسدادِ دہشت گردی کی عدالت نے سانحۂ بلدیہ ٹاؤن فیکٹری کیس کی سماعت کے دوران ملزم زبیر چریا کے وکیل سے حتمی دلائل طلب کر لیے۔

دورانِ سماعت ایم کیوایم کے رہنما رؤف صدیقی کے وکیل اور اسپیشل پبلک پراسیکیوٹر نے دلائل مکمل کر لیے۔

اسپیشل پبلک پراسیکیوٹر نے اپنے دلائل میں کہا کہ رؤف صدیقی نے دباؤ ڈال کر فیکٹری مالکان کے خلاف مقدمہ درج کرایا، ملزم عبدالرحمٰن بھولا نے بھی بیان میں اعتراف کیا تھا۔

انہوں نے کہا کہ رؤف صدیقی اور عماد صدیقی نے متاثرین اور مالکان کے درمیان معاملہ حل کرنے کے لیے دباؤ ڈالا، رؤف صدیقی اور عماد صدیقی نے فیکٹری مالکان سے پانچ کروڑ روپے وصول کیے۔

اسپیشل پبلک پراسیکیوٹر نے مزید کہا کہ فیکٹری مالک ارشد بھائلہ نے بھی اپنے بیان میں رؤف صدیقی کا نام لیا، شواہد کی روشنی میں رؤف صدیقی کو بھی سزا دی جائے۔

رؤف صدیقی کے وکیل نے عدالت میں دلائل دیتے ہوئے کہا کہ وقوعے کے 3 دن بعد ایم کیو ایم رہنما رؤف صدیقی نے وزرات سے استعفیٰ دے دیا تھا۔

یہ بھی پڑھیئے: سانحۂ بلدیہ، مرکزی ملزمان اپنے بیانات سے مکر گئے

انہوں نے یہ بھی کہا کہ فیکٹری مالکان اور رحمٰن بھولا نے سنی سنائی باتوں پر اپنا بیان ریکارڈ کرایا۔

کراچی کی انسدادِ دہشت گردی کی عدالت نے 17 جون کو ملزم زبیر چریا کے وکیل سے حتمی دلائل طلب کر لیے۔

تازہ ترین