حکومت پنجاب نے صوبے میں کورونا وائرس سے خراب صورتحال میں بہتری کے بعد صنعتوں کے اوقات کار بڑھانے کا فیصلہ کرلیا۔
اس حوالے سے سیکریٹری پرائمری اینڈ سیکنڈری ہیلتھ کیئر نے نوٹیفکیشن بھی جاری کردیا۔
نوٹیفکیشن کے مطابق تمام صنعتیں اور فیکٹریاں پورے ہفتے 24 گھنٹے کام کر سکیں گی۔
اس میں کہا گیا کہ تعمیرات سے متعلقہ شعبہ جات اور کاروبار بھی پورے ہفتے کام کریں گے۔
سیکریٹری صحت کیپٹن (ر) محمد عثمان کے مطابق ایس او پیز پر عمل درآمد کرتے ہوئے کاروبار کھولنے کی اجازت ہوگی۔
محمد عثمان کا کہنا تھا کہ حفاظتی تدابیر اختیار نہ کرنے والے کاروبار فوراً بند کردیے جائیں گے۔
انھوں نے کہا کہ اس نوٹیفکیشن کا اطلاق فوری طور پر آج سے ہوگا۔