• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

شکاگو میں کھلے عام لوٹ مار، توڑ پھوڑ میں پولیس افسران زخمی، 120 سے زائد افراد گرفتار

آج کا اخبار
یورپ سے
30 اگست ، 2020
شکاگو میں کھلے عام لوٹ مار، توڑ پھوڑ میں پولیس افسران زخمی، 120 سے زائد افراد گرفتار

شکاگو ( نیوزڈیسک) امریکی ریاست الینوائے کے شہر شکاگو کی پولیس نے 120سے زائدمشتبہ جرائم پیشہ افراد کو گرفتار کرلیا۔ ذرائع ابلاغ کے مطابق شہر بھر میں جرائم بڑھتے جارہے ہیں اور شہری غیر محفوظ ہیں۔ حکام کا کہنا ہے کہ گزشتہ روز شہر کے متمول علاقے میں خریداری کے مرکز اور دیگر علاقوں میں لوٹ مار، بد امنی اور توڑ پھوڑ کی روک تھام کے دوران 13 پولیس افسر زخمی ہوئے۔ پولیس سربراہ ڈیوڈ براؤن کا کہنا تھا کہ واقعات منظم مجرمانہ سرگرمی ہے۔ براؤن کا کہنا ہے کہ آیندہ ہدایات تک شہر بھر میں پولیس کی بھاری نفری تعینات رہے گی۔ شکاگو کی میئر لوری لائٹ فٹ کا کہنا تھا کہ جرائم کے واقعات شہر پر حملے کے مترادف ہیںاور حراست میں لیے گئے افراد کو لوٹ مار، امن عامہ میں خلل اور پولیس کے خلاف مار پیٹ کے الزامات کے تحت کڑی سزا دی جائے گی۔ مقامی ذرائع ابلاغ کے مطابق جن دکانوں اور کاروباری مراکز میں لوٹ مار ہوئی وہ 25مئی کو منیا پولس میں جارج فلوئیڈ کی ہلاکت کے بعد ہونے والے مظاہروں کے دوران بند کر دیے گئے تھے اور حال ہی میں دوبارہ کھلے تھے۔ میگنی فی سینٹ مائل نامی علاقہ شکاگو میں سیاحوں کی توجہ کا سب سے بڑا مرکز ہے۔ وہاں بد امنی اس وقت شروع ہوئی، جب دیواروں اور دکانوں کے شٹروں پر پولیس مخالف نعرے لکھے ملے۔ بعد ازاں جرائم پیشہ افراد نے شہر میں ایک بینک کو لوٹا اور سڑکوں پر اے ٹی ایم مشینیں پھینک دیں۔ کئی دکانوں کے تالے توڑ کر سڑکوں پر ٹیلی وژن سیٹ اور الیکٹرانکس کے دیگر سامان کے ڈبے پارکنگ لاٹوں میں ڈال دیے گئے۔ انتظامیہ کا کہنا ہے کہ وارداتیں بہت منظم کاروائی تھی۔

تازہ ترین