اللہ کی قسم، موقع ملا تو کراچی کو پیرس بنادوں گا، شہباز شریف

اپوزیشن کی سب سے بڑی جماعت مسلم لیگ (ن) کے صدر اور قائد حزب اختلاف شہباز شریف نے کہا ہے کہ اللّٰہ کی قسم کھا کر کہتا ہوں اگر موقع ملا تو کراچی کو پیرس بنادوں گا۔

ناظم آباد میں عوامی جلسے سے خطاب میں شہباز شریف نے کہا کہ پورے ملک کے عوام کو اپنی گود میں لینے والے کراچی کو اس کا حق نہیں دیا گیا۔

انہوں نے کہا کہ وزیراعظم عمران خان نے کراچی کے لیے 160ارب روپے کا اعلان کیا لیکن ایک دھیلا خرچ نہیں کیا۔

شہباز شریف کی بلاول ہائوس میں آصف زرداری سے ملاقات

شہباز شریف وفد کے ہمراہ بلاول ہائوس پہنچے جہاں انہوں نے پیپلز پارٹی کے شریک چیئرمین آصف علی زرداری سے ملاقات کی ، جبکہ بلاول بھٹو زرداری بھی ملاقات میں موجود تھے ۔

اپوزیشن لیڈر نے وزیراعظم سے مطالبہ کیا کہ وہ فوری طور پر کراچی کا دورہ کریں اور تباہی کو اپنی آنکھوں سے دیکھیں۔

ان کا کہنا تھا کہ بارشوں میں جاں بحق افراد کے ورثا کو فوری امداد دی جائے، جن کے گھر تباہ ہوئے، ان کے گھروں کی فوری تعمیر کی جائے۔

شہباز شریف نے مزید کہا کہ افسوس کی بات یہ ہے کہ جو شہر قائداعظم اور مادر ملت کا شہر ہے وہاں بھی وزیراعظم کو آنے کی توفیق نہ ہوئی۔

کراچی کو جتنا بنایا نون لیگ نے بنایا، شہباز شریف

مسلم لیگ نون کےصدر اور قومی اسمبلی میں قائدِ حزبِ اختلاف میاں شہباز شریف کا کہنا ہے کہ کراچی کو ابھی تک جتنا بنایا ہے نون لیگ نے بنایا ہے۔

انہوں نے کہا کہ اگر نواز شریف کی حکومت ہوتی تو وہ پہلی فرصت میں کراچی آتے۔

ن لیگی صدر نے یہ بھی کہا کہ شہر میں تاریخی بارشیں ہوئیں، شہر سمندر بن گیا، پورے پاکستان کی ہمدردیاں آپ کو پہنچانے آئے ہیں۔

ان کا کہنا تھا کہ بیشتر افراد اپنی جانوں سے ہاتھ دھو بیٹھے، اندرون سندھ میں فصلیں تباہ ہوگئیں۔

شہبازشریف نے کہا کہ میں نے الیکشن میں کہا تھا کہ کراچی سے گندگی 6 ماہ میں صاف کراؤں گا اور سڑکیں بنوانے سے متعلق 1 سال کا ٹائم فریم دیا تھا مگر قدرت کو کچھ اور ہی منظور تھا۔

انہوں نے استفسار کیا کہ حکمران جماعت پی ٹی آئی کے ایم این ایز اور ایم پی ایز نے کراچی کےلیے کیا کیا؟ مجھے موقع ملا تو کراچی کو لاہور نہیں پیرس بناؤں گا۔