موٹروے زیادتی، پولیس 10فٹ پر موجود عابد کو نہ پکڑسکی

ننکانہ صاحب(نمائندہ جنگ) گجر پورہ موٹر وے زیادتی کیس کا مرکزی ملزم عابد علی ملہی شیخوپورہ اور قصورکے بعد ننکانہ پولیس کو بھی چکمہ دے کر فرار ہوگیا، پولیس 10 فٹ پر موجود عابد کو نہ پکڑ سکی، ملزم سالی سے پارک میں ملنے آیا تھا، مکینوں کی پولیس کو اطلاع، ایس ایچ او صرف 3 اہلکار ساتھ لایا۔

پولیس کا ایکشن ملزم کی سالی کشور اور 2سالوں کو پکڑ کر پوچھ گچھ تک محدود، رہا بھی کردیا، علاقے میں سرچ آپریشن بھی بے سود رہا۔ تفصیلات کےمطابق مرکزی ملزم عابد علی ملہی جمعرات کو سہ پہر 4بجے پرانا ننکانہ میں اپنی سالی کشور بی بی سے ملنے آیا تھا۔

ملزم عابد علی رائے بلار پارک میں سالی کشور سے بیوی بشریٰ کے متعلق پوچھ رہاتھا کہ اہل محلہ نے 15 پر کال کرکے پولیس کو ملزم عابد علی کی موجودگی کی اطلاع دی، حسب روایت پولیس25 منٹ تاخیر سے پہنچی۔

عینی شاہدین کا کہناکہ ایس ایچ او تھانہ سٹی ننکانہ صاحب عبدالخالق صرف 3 پولیس اہلکاروں کے ہمراہ موقع پرپہنچاتو کالر نے ایس ایچ او تھانہ سٹی ننکانہ صاحب کو بتایا کہ یہ عابد علی ہے۔

کالر کی آواز سنتے ہی ملزم عابد علی پولیس کے ہاتھوں سے نکل گیا حالانکہ پولیس اور ملزم کا درمیانی فاصلہ صرف دس فٹ کا تھا جبکہ تھانہ سٹی اور رائے بلار بھٹی پارک کا درمیانی راستہ صرف پانچ منٹ کا ہے۔