• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

نیب کی آغا سراج درانی کے بیٹے کو بیرون ملک جانے کی اجازت دینے کی مخالفت

 قومی احتساب بیورو (نیب) نے آغا سراج درانی کے بیٹے شہباز درانی کو بیرون ملک جانے کی اجازت دینے کی مخالفت کردی۔

سندھ ہائیکورٹ میں سندھ اسمبلی کے اسپیکر اور پیپلز پارٹی کے رہنما آغا سراج درانی کے بیٹے شہباز درانی کی بیرون ملک جانے سے متعلق درخواست کی سماعت ہوئی، نیب کی جانب سے جواب سندھ ہائیکورٹ میں جمع کرادیا گیا۔

 نیب نے شہباز درانی کو بیرون ملک جانے کی اجازت دینے کی مخالفت کرتے ہوئے کہا کہ آغا شہباز درانی بینفشری اور بے نامی دار ہیں اور کرپشن ریفرنس کا سامنا کررہے ہیں، آغا شہباز درانی کے نام پر پلاٹ،مہنگی گاڑیاں اور بینک اکاوئنٹس ہیں، ریکارڈ کے مطابق درخواست گزار کی اتنی آمدنی نہیں کہ تمام چیزیں خریدیں۔

نیب کی جانب سے عدالت میں جمع کروائے گئے جواب میں بتایا گیا کہ شہباز درانی نے انویسٹی گیشن جوائن نہیں کی تھی نہ ہی ریکارڈ پیش کیا، ملزم کو کئی نوٹس جاری کئے گئے کہ اپنا بیان رکارڈ کرائیں، ملزم مزید تحقیقات میں شامل ہونے میں ناکام رہا ہے، شہباز درانی امریکہ کی دہری شہریت رکھتے ہیں اور فرار ہوسکتے ہیں۔

شہباز درانی کو بیرون ملک جانے کی اجازت دی گئی تو واپس نہیں آئیں گے ملزم کی بیرون ملک جانے کی اجازت کی درخواست مسترد کی جائے اور ملزم کو انویسٹی گیشن جوائن کرنے کی ہدایت کی جائے۔

عدالت نے درخواست گزار کو آئندہ سماعت پر جواب الجواب جمع کرانے کی ہدایت کرتے ہوئے مزید سماعت 16 اگست تک ملتوی کردی۔

قومی خبریں سے مزید