افغان فوج کو بدعنوانی اور قیادت کے مسائل کا سامنا، خوراک نہ گولہ بارود

کابل (جنگ نیوز) افغانستان میں بین الاقوامی افواج کے امریکی کمانڈر جنرل جان نکولسن نے کہا ہے کہ افغانستان کو آئندہ سال فوج میں بدعنوانی اور قیادت کے مسائل کے بڑے چیلنج درپیش ہوں گے۔ جنرل نکولسن نے پینٹاگان کو کہا کہ افغانستان کی سکیورٹی فورسز کے کچھ حصے اس سے متاثر ہیں اور اس کی وجہ سے میدان جنگ میں فوجیوں کی مناسب دیکھ بھال نہیں ہو رہی ہے۔جنرل نکولسن نے کہا کہ ترسیل کے نظام کے غیرموثر ہونے اور بدعنوانی کی وجہ سے بیرونی چوکیوں پر تعینات فوجیوں کے پاس نا تو پانی و خوراک ہے اور نا ہی لڑائی کے لیے درکار گولہ و بارود ہے۔افغان فورسز کا اب بھی ملک کی دو تہائی آبادی پر کنٹرول ہے تاہم رواں سال ستمبر سے یہ تعداد 68 فیصد سے کم ہو کر 64 فیصد ہو گئی ہے۔