اسحاق ڈار خزانہ ساتھ لے گئے، نیا وزیر کیا مکھیاں ماریگا، شجاعت

لاہور(نمائندہ جنگ) مسلم لیگ کے صدر و سابق وزیراعظم چوہدری شجاعت حسین نے کہا ہے کہ وزیرخزانہ اسحاق ڈار جاتے جاتے خزانہ تو ساتھ لے گئے ہیں نئے وزیرخزانہ کیلئے کیا بچا ہے جب خزانہ ہی خالی ہے تو اس عہدے کی ضرورت نہیں کیا نئے وزیر خزانہ نے مکھیاں مارنی ہیں،عدلیہ کے تقدس کو پامال کرنے والے ملک کے وفادار اور مخلص کیسے ہو سکتے ہیں، ن لیگ کے اکثر افراد سپریم کورٹ کے خلاف بول کر توہین عدالت کے مرتکب ہوتے رہے ،عدلیہ کے تقدس کو پامال کرنے والے ملک کے وفادار اور مخلص کیسے ہو سکتے ہیں۔

ہماری جماعت میں وکلا کی مسلسل شمولیت اور اظہار اعتماد اس بات کی علامت ہے کہ یہی وہ واحد جماعت ہے جو ملکی مفاد کی خاطر ہر قربانی دینے کو تیار ہے، اپنی رہائش گاہ پر عالمگیر ایڈووکیٹ اور ملک کرامت ایڈووکیٹ کی سربراہی میں سینئر وکلا کے وفد سے ملاقات اور  مسلم لیگ میں شمولیت کے موقع پر گفتگو کر رہے تھے۔  

مسلم لیگ میں شامل ہونے والوں میں  حسین، رفیق انیس، عثمان احمد کھوکھر، رانا احسان اللہ، عارف محمود چودھری، چودھری کرامت، ملک غضنفر سعید اور ذوالقرنین واہلہ شامل تھے جبکہ سینئر ایڈووکیٹ جہانگیر اے جھوجھہ، نادر دوگل اور اشتیاق گوہر ایڈووکیٹ بھی موجود تھے،چودھری شجاعت حسین نے   کہا کہ  میں نے پہلے کہہ دیا تھا کہ شریف خاندان ملک سے فرار ہو جائے گا ہم 12 سال تک ایک ساتھ رہے ہیں ہم ان کو اچھی طرح جانتے ہیں اب یہ واپس نہیں آئیں گے، شریف خاندان نے نہ تو پہلے عدالتوں کا سامنا کیا اور نہ ہی اب کریں گے۔