اسلام آباد (نمائندہ جنگ) نئے ٹیکسوں اور مہنگائی کے ستائے عوام پر یکم جولائی سے ’’پٹرول بم‘‘ گرانے کی تیاریاں جاری ہیں‘ پٹرولیم مصنوعات کی قیمتوں میں 8 روپے 60 پیسے تک اضافے کی سمری بھجوا دی گئی۔ اوگرا کی طرف سے وزارت پٹرولیم کو بھجوائی گئی سمری میں پٹرولیم مصنوعات 8 روپے 60 پیسے فی لٹر تک مہنگی کرنے کی سفارش کی گئی ہے۔ سمری کے تحت یکم جولائی سے پٹرول کی قیمت میں 1 روپے 93 پیسے فی لٹر‘ ہائی سپیڈ ڈیزل کی قیمت میں 3 روپے 75 پیسے فی لٹر جبکہ مٹی کے تیل کی قیمت میں 8 روپے 60 پیسے فی لٹر اضافے کی سفارش کی گئی ہے۔ اسی طرح ہائی آکٹین کی قیمت میں 3 روپے 50 پیسے فی لٹر اور لائٹ ڈیزل کی قیمت میں 5 روپے 37 پیسے فی لٹر اضافے کی سفارش کی گئی ہے۔ ذرائع کا کہنا ہے کہ وزیراعظم کی منظوری کے بعد وزارت خزانہ حتمی اعلان کل کرے گی۔