پاکستان کے بڑے ایئرپورٹس پر فوگ اور موسمی خرابی سے متاثرہ فلائٹس کے مسافروں کی سہولت کے لیے ٹاسک فورس بنانے کا اعلان کیا گیا ہے۔
ترجمان سول ایوی ایشن اتھارٹی (سی اے اے) کے مطابق ایئرپورٹ مینجر ٹاسک فورس کے سربراہ ہوں گے۔
ٹاسک فورسز اپنے اپنے ایئرپورٹس پر متاثرہ فلائٹس کے مسافروں کو ہر ممکن سہولت پہنچائے گی۔
ایئرلائنز، ایئرپورٹ سیکیورٹی فورس، وفاقی تحقیقاتی ادارے کی مدد سے امیگریشن کے ذریعے مسافروں کے ایئرپورٹ پر معاملات کو جلد از جلد نمٹایا جائے گا۔
ٹاسک فورس کے ارکان ٹریفک پولیس کے ساتھ رابطے میں رہیں گے تاکہ کار پارکنگ اور لینوں میں رش نہ بڑھے۔
ترجمان کے مطابق ایئرلائنز کے ذریعے مسافروں کے قیام و طعام اور ٹرانسپورٹ سہولیات کا بندوبست کیا جائے گا۔ مسافروں اور ایئرپورٹ آنے والوں کو موسمیات کی معلومات دی جائیں گی۔
موسمیاتی تبدیلیوں سے میڈیا نمائندوں کو بھی با خبر رکھا جائے گا جبکہ ایئرلائنز اپنے مسافروں کو ڈیپارچر ٹائم سے متعلق باخبر رکھیں گی۔
ترجمان کا کہنا تھا کہ فلائٹ انفارمیشن ڈسپلے سسٹم پر تازہ ترین معلومات کو یقینی بنایا جائے گا۔