فرمان الہی
نماز کے اوقات
وزیر بلدیات سندھ ناصر شاہ نے کہا ہے کہ حافظ نعیم کا بیان کہ کراچی پولیس میں ایک بھی مقامی نہیں افسوسناک اور تعصب سے بھرا ہوا ہے، انہوں نے کہا کہ کیا جماعت بھول گئی ہے کہ کراچی کے درسگاہوں میں اسلحہ انہی کے لوگوں نے پہنچایا اور تعلیم کو تباہ کیا۔
وزیر بلدیات سندھ ناصر شاہ کا جماعت اسلامی کراچی کے امیر حافظ نعیم کے بیان پر ردعمل دیتے ہوئے کہنا تھا کہ حافظ نعیم اتنی بڑی بات کیا کریں جتنی ان کی سیاسی حیثیت ہے۔
انہوں نے کہا کہ پیپلز پارٹی کے خمیر میں عوام کی خدمت اور سیاسی دانش ہے جب کہ جماعت اسلامی کے خمیر میں تعصب ہے۔
ناصر شاہ کا کہنا تھا کہ پیپلز پارٹی جماعت اسلامی کی طرح تنگ نظر اور تعصب پرست نہیں۔
وزیر بلدیات کا کہنا تھا کہ حافظ نعیم میئر بننے کے شوق میں اتنے تعصب کا مظاہرہ کرینگے اس کا اندازہ بھی نہیں تھا، پیپلز پارٹی نے مردم شماری پر عمران حکومت سے اس وقت اختلاف کیا جب جماعت اسلامی ان کی بی ٹیم تھی۔
ناصر شاہ کا مزید کہنا تھا کہ کراچی کا امن تو پیپلز پارٹی کی حکومت نے بحال کیا جب کہ جماعت اس وقت بھی دہشتگردی کو ہوا دے رہی تھی، کراچی کے عوام باشعور ہے اور وہ کسی تنگ نظر اور تعصب پرست کا انتخاب کبھی نہیں کرینگے۔
