بھارت: اڈانی گروپ نے شیئرز کی فروخت روک دی، 100 ارب ڈالر کا نقصان

February 02, 2023

اڈانی گروپ کا دفتر، فائل فوٹو

بھارت کے اڈانی گروپ نے ڈھائی ارب ڈالر کے شیئرز کی فروخت روک دی جس سے مجموعی طور پر گروپ کو 100 ارب ڈالر کا نقصان پہنچا۔

گوتم اڈانی ایشیا کے امیر ترین شخص ہونے کا اعزاز بھی کھو بیٹھے ہیں۔

فوربز کی فہرست کے مطابق گوتم اڈانی گزشتہ ہفتے دنیا کے امیر ترین افراد کی فہرست میں تیسرے نمبر پر تھے، اب وہ 16ویں نمبر پر آچکے ہیں۔

گوتم اڈانی نے شارٹ سیلر ہنڈن برگ کی رپورٹ کے بعد حصص کی فروخت روک دی تھی۔

بھارت کے مرکزی بینک نے مقامی بینکوں سے اڈانی گروپ آف کمپنیز کے ساتھ ان کے لین دین کی تفصیلات طلب کی ہیں۔

خیال رہے کہ ہنڈن برگ کی گزشتہ ہفتے کی ایک رپورٹ میں اڈانی گروپ پر آف شور ٹیکس ہیونز کے غلط استعمال اور اسٹاک میں ہیرا پھیری کا الزام عائد کیا گیا تھا۔

اس رپورٹ میں اڈانی گروپ کی 7 کمپنیوں کے قرض اور ویلیوایشن پر بھی خدشات ظاہر کیے گئے تھے لیکن اڈانی گروپ نے ان الزامات کو مسترد کر دیا تھا۔