نسیم شاہ کا اپنی منگنی کی افواہوں پر ردِعمل

June 05, 2023

نسیم شاہ، فائل فوٹو

نوجوان پاکستانی فاسٹ بولر نسیم شاہ نے منگنی کی افواہوں پر اپنے ردِعمل کا اظہار کیا ہے۔

نسیم شاہ کے حوالے سے گزشتہ کچھ عرصے سے سوشل میڈیا پر یہ خبریں گردش کر رہی تھیں کہ ان کی منگنی ہوگئی ہے۔

انگلش لیگ ٹی ٹوئنٹی وائیٹلٹی بلاسٹ کھیلنے میں مصروف قومی فاسٹ بولر ایک بار اپنی انسٹاگرام اسٹوری پر اپنی منگنی کے بارے میں پھیلی تمام افواہوں کی تردید کرچکے ہیں۔

لیکن حال ہی میں جیو نیوز سے خصوصی گفتگو میں ایک بار پھر کرکٹر نے اس حوالے سے بات کی۔

اُنہوں نے کہا کہ میری منگنی کی تمام افواہیں بالکل غلط ہیں کیونکہ ایسا کچھ نہیں ہوا، مجھے سمجھ نہیں آتی کہ سب میری منگنی یا شادی میں اتنی دلچسپی کیوں رکھتے ہیں؟

اُنہوں نے مزید کہا کہ لوگ کرکٹ میں کھلاڑیوں کی کارکردگی پر توجہ دینے کے بجائے اچانک ان کی شادیوں اور مصروفیات پر کیوں توجہ دینے لگتے ہیں؟

نسیم شاہ نے مداحوں کو مشورہ دیا کہ آپ لوگ ہمیں کرکٹ کھیلتا دیکھیں اور اس سے لطف اندوز ہوں، شادی میرا ذاتی معاملہ ہے اور یہ تب ہی ہو گی جب قسمت میں ہوگا۔

اُنہوں نے انگلش لیگ کا حصّہ بننے کے بارے میں بات کرتے ہوئے کہا کہ مجھے ابھی تک صرف چند گیمز کھیلنے کا موقع ملا جوکہ ایک اچھا تجربہ تھا اور میں اپنی کارکردگی سے خوش ہوں۔

یاد رہے کہ نسیم شاہ نے ٹی 20 بلاسٹ میں لیسٹر شائر فاکس کے لیے اب تک چار میچ کھیلے ہیں۔